Illua-tungiliuttut: Suleqatiigit suniarpisiuna?

Kommune Qeqertalimmi aaqqissuussaaneq atuutiinnassaaq inerisassaarli. Demokraatit, Inuit Ataqatigiit Naleqqallu politikkikkut isumaqatigiissutaat taama ilaatigut ippoq.

Aaqqissuussaanerli qanoq inerisarneqassanersoq pillugu borgmesteri, Demokraatineersoq, Simigaq Heilmann, KNR-imut siusinnerusukkut akissutissaqanngilaq.Borgmesterip taama nalunaarnera kommunimi partiini illua-tungiliuttuni ilaasortaqarnerpaap nuannarinngilaa.

- Tigussaasumik qanoq iliorniarnerminnik nassuiaateqaratik, taamatut inuiaqatigiinnut saqqummernerat, uagut tungitsinninngaanniit toqqissisimananngitsorujussuuvoq.

- Aammalu ersarluttuliorneq, tassa imatut oqariartornertut paasivara; Maannakkut qanoq iliussalluta naluarpumik oqariartorlutik, kommunip siunissami aqunneqarnissaa ilusilersorniarlugu suleqatigiilersut massakkut aallartipput, Siumup gruppiani siulittaasoq, Aqqa Samuelsen, KNR-imut oqarpoq.

Paatsiveeruttoq

Aaqqissuussaanerup inerisarnera kommunip aningaasaataanik qanoq atuiffiutigissanersoq borgmesterip KNR-imut aamma akisinnaanikuunngilaa. Tamanna politikkikkut suliaqartutut innuttaasutullumi pitsaanngitsutut nalilerneqarpoq.

- Kisiannili pitsanngorsaatit timitalerniarnerlugit aammalu qanoq aningaasartalersorniarnerlugit suleqatigiilersut saqqummiussaqanngillat. Tamanna kommunimi innuttaaqataasutut aammalu qinikkatut inissisimalluni paatsiveerunnartorujussuuvoq. Susoqarniartoruna? Aqqa Samuelsen oqarpoq.

Siumut: Isumalluusersorput

Aaqqissuussaaneq qanoq ineriartortinneqassanersoq kommunalbestyrelsip oqaluusereqqaassagaa borgmesteri, Simigaq Heilmann, KNR-imut siusinnerusukkut ilisimatitsivoq. Siumulli paasinninnera naapertorlugu siuttut namminneq isummaminnik siulliullutik siunnersuuteqartussaapput. Uanili tamanna pinngitsutut nalilerneqarpoq.

- Takorloorsimasartik anguniarsimasartillu aamma kommunimi siuttunngortut takorluuiffigilereersimasussaagaluarpaat. Taava allanik isumalluusersuinnaratik namminneq qanoq iliornissaminnik siuttutut aamma akisussaaffeqarput.