Avannaani angallanneq: Illoqarfinni pingasuni maannamut taamaatinnerit 707-iusut

Avannaani timmisartunik qulimiguulinnillu angalasussaatillutik ullorpassuit ilaatigut sapaatit akunnialuit kinguaattoortarlutik angalasussat amerlasuut KNR-imut allagaqaatigisarpaat.

Uummanami eqqaanilu angalasussat qaammatini pingasuni taamaatiinnarneri 292-iusimapput.

Sila pissutigalugu taamaatitsinerit 131-iusimapput, teknikkimillu ajoquteqartoqarnera 82-eriaq angalanissamik taamaatitsisimalluni.

Qulimiguullip ajoqusersimanera kinguniperluuteqartitsisoq

Qulimiguulimmillu ajoqusertoqarsimanera Uummannami angallannermut ajulusoortitsisimasoq Air Greenlandip ima nassuiaatigaa:

- Qulimiguulik Uummannami angallassisartoq februaarip arfineq-pingajuanni ajoquteqartoq paasigatsigu nunamiiginnartariaqarsimavoq. Qulimiguullillu ajoqutaa naliginnaasuunngimmat, timmisartuliortartut Airbusiminngaanneersut ajoqut aaqqissortariaqarsimavaat. Qulimiguullip iluarsineqareerluni februaarip 27-ani piareeqqittoq nalunaarutigineqarpoq, Air Greenland KNR-imut taama allappoq.

Qulimiguullit ikilinerat pissutigalugu qulimiguulimmik Pituffimmiit nuutsitsigallarnissaat iluatsinngimmat, qulimiguulik Ilulissaneersoq Uummannami angallassisariaqartarsimasoq, Air Greenland allappoq.

Uummannamiit Qaarsunut angallassinissaraluanik taamaatitsisarnerit kingunerisaannik qaammatini pingasuni angallassinissat Air Greenlandip 60-inik amerlisimavai.

Qaanaamili Upernavimmilu angallannerup taamaatinneqakulanera silamit peqquteqarnerusoq, Air Greenland KNR-imut allappoq.

Akuersaaginnarneq tamaanga killeqarpoq

Jan Kleinschmidt nulianilu Upernavimmiit Københavniliarniaraluartuni kinguaattoortut ilagaat.

Avannaaniit angalaniarneq Jan Kleinschmidtip kipiluttunarnerarpaa:

- Maanimiut paasiniaaffigaakka kikkut ilaasussaagaluarnersut aamma kinguaattoortut. Amerlasoorpassuit ataatsimiigiartussaagaluit, arsittussaagaluit, feriertussaagaluit tamarmik eqqorneqarput. Ajuuikkami taama pineqarnerput., taanna oqarpoq.

Avannaaniillu akuersaaginnarsinnaajunnaarlutik, Jan Kleinschmidt oqarpoq:

- Malunnartorujussuugami annertoorujussuullunilu isorliunerusut Qaanaakkut Upernavikkut soqutigineqanngitsut. Immaqa Nuummi ernumagisaraat unitsitsinissartik. Taqqavani immaqa naammagittaalliortarneri sakkortunerusaramik. uagut maanimiut qangali anngaaginnartuugatta, naammagilerparput anngaaginnarnerput, taanna oqarpoq.

Qaanaamimi Upernavimmilu qaammatini pingasuni sila pissutigalugu taamaatitsinerit 326-iusimapput teknikkimillu ajoquteqarneq 14-eriaq taamaatitsisimalluni.

Silarloqattaarnerit, sialussuarnerit, erseqqarinnginnerit, silaannaq unerisimanngitsoq mittarfiillu quasattut angalasussanik taamaatitsisarnernut peqqutaaqataasut, Air Greenland allappoq.

Qulimiguullit avannaanut tulluutinngimmata allaanernik taarserneqartariaqartut, politikerinit oqaatigineqartarnikuuvoq.

Sillimaniarneq pingaarnerpaatillugu silalu angalaffissaanngikkaangat angalatitsisaratik, Air Greenlandip oqaatigaa.