Assit takukkit: Kunngip Nuummut tikeraarnerani pisut
Kunngip Frederiup nunatsinnut tikeraarnera silap allanngorarneranik eqqugaaqattaarpoq. Tamanna pissutigalugu tikeraarnera ullormik ataatsimik sivitsorneqarpoq.
Kunngi mittarfimmut marlunngornermi ullaap tungaani tikeqqammitsiarluni naalakkersuisut siulittaasuat, Jens-Frederik Nielsen (D) peqatigalugu Qinngorpumi talittarfiliarput.
Taakku Kapisilinnut angalanissaat ilaatigullu atuarfimmut pulaarnissaa pilersaarutaagaluarpoq, piffissaalatsinerli pissutigalugu kangerlummut aalisariaannarput, kunngilu suluppaakkamik pisaqarluni.
Kunngi Nuummut uteqqikkami Katuamut nuummiut 350-it najuuffigisaannut allarpassuillu inissaqannginnera pissutigalugu iserfigisinnaanngisaannut kaffisoriartorpoq.
Tamatuma kingorna Jens-Frederik Nielsenip kunngi Pinerluuteqarsimasunut Inissiisarfiup eqqaanut UTV-nik angalaaqatigaa. Ullorlu Hans Egedep Illuani naalakkersuisunik nereqateqarnermik naggaserneqarpoq.
Pingasunngorneq kunngip uumassusililerinermik ilinniarfimmut nutaamut, SILA-mut Ilisimatusarfimmiittumut pulaarneranik aallartippoq, kingornalu Inatsisartut siulittaasuanut, Kim Kielsenimut (S) ullup-qeqqasioriartorluni.
Kunngip pisortatigoortumik angalaarnera imarsiornermik ilinniarfimmut pulaarneranik naggaserneqarpoq, umiarsuarmik ingerlatsinermik ilinniarfiat takuaa. Kunngi Frederik qarasaasiatigut kilisaamik aqutsiffik misilippaa Nuullu umiarsualivianit aallarluni.
