Rektori: Ilisimatusarfiup USA-mik suleqateqarnerit nutaat unitsippai

Pinngortitaleriffik kisimi USA-mik suleqatissarsiorunnaanngilaq. Aamma Ilisimatusarfik taamaaliorpoq.

Rektor, Mari Kleist, taama oqarpoq.

- Suliniuteqarnitsinni aalajangiusimasarput attatiinnarparput. Nutaanik suleqatissarsiunnginnissarput ukioq kingullerli eqqumaffigisorujussuuarput. Suleqatigeriikkagulli suleqatigiinnassavagut.

Ilisimatusarfimmi rektorip Mari Kleistip nunat, suliffeqarfiillu sorliit suleqatigiinnermilu peqataaffigineqartut Ilisimatusarfimmit nalinginnaasumik eqqumaffigineqartarnerat oqaluttuaraa. USA-mulli tunngatillugu pissutsit pissutigalugit, periusertik ukioq kingulleq allanngortippaat. Assi © : Ilisimatusarfik

Mari Kleistip Ilisimatusarfiup ilinniartunik ilinniarnerminnut atatillugu nunamut allamut inatsisit naapertorlugit ilinniariartariaqartunik ilinniartoqarnera oqaluttuaraa. Universitetit aamma Ph.d-nngorniartut paarlaasseqatigiinnermikkut tassuuna suleqatigineqarput.

- Ilinniartut ilinniarfigisinnaasaannik universitetinik suleqateqarnissaq akisussaaffigaarput. Aammattaaq ilinniartut ajornartorsiortinnginnissaat akisussaaffigaarput.

USA-mut tunngatillugu suliniutit nutaat siorna aallartinneqarput. Rektorillu oqarnera naapertorlugu, Ilisimatusarfik nammineq allannguiniarluni iliuuseqarpoq.

Naalakkersuisoqarfinnit isertortumilluunniit paasiniaasartunit ilitsersorneqarsimanngillat.

- Nammineq taama aalajangerpugut, aamma oqartussat isertortumillu paasiniaasartut attaveqarfigiuarpagut. Pissutsit nammineq aqussinnaanngisagut, eqqumaffigisagulli, nalorninartorsiortitsimmata taamaaliorpugut. Mianersornissamut periuseqartariaqarpugut.

PET tunuliaqutaasunik misissuisoq

KNR-ip allaaserisaatut Videnskabernes Selskabip oqarnera naapertorlugu universitetini isumannaallisaanerit, sorsunnerup nillertup nalaani isumannaallisaanernit pitsaanerupput.

Rusland, Kina Iranilu siornatigut isiginiarneqarnerpaagaluartut USA maanna aamma isiginiarneqarpoq - pingaartumik Kalaallit Nunaannut soqutiginninnerat eqqarsaatigalugu.

Mari Kleistip Ilisimatusarfiup naalakkersuisunik, naalakkersuisoqarfinnik Politiillu isertortumik paasiniaasartuinik misissuinerit tungaatigut suleqateqarluarnera oqaluttuaraa. 

Ilisimatusarfiulli rektoriata universiteti ilisimatusarnermik ingerlatsiviuinnaanani, aammali ilinniartut najukkamilu inuiaqatigiinnik tunngaveqarnera erseqqissarpaa: - Taamaattumik suleqatigiilluarnerit siornatigutut ingerlatiinnarusuttarpagut. Aammali eqqumaffiginnittorujussuuvugut. Oqartussaasunit oqariartuutaasut malinnaaffigalugillu malippagut, Mari Kleist oqarpoq. Assi © : Victoria Julie Schou / KNR

PET-ip kinaassutsikkut paasissutissat pillugit misissuineq isumagisarivaa.

- Ullumikkut pissutsit taamaannerat nunarsuullu inuuffigisatta taamaannera paasilluarparput. Kikkut suleqatigissanerlugit mianersuutigisariaqarparput. Suleqatigiinnissap siunertaa apeqqusertuaannarparput, rektori oqarpoq:

- Suut tamaasa misissoqqissaarneqarnissaat nalilersorneqarnissaallu sapinngisamik piumasaraarput, aammali ilaannikkut misissuisoqartariaqarneq ajorpoq. Nunat aalajangersimasut ilisimatusarfiilluunniit akornanni suleqatigiilluarnerit pineqarnerat, siornatigulluunniit misissuisoqareersimanera tamatumunnga pissutaasinnaavoq.

Pissutsit nalinginnaasut atuutilernissaat kissaatigaat

USA-p Kalaallit Nunaanni ilisimatusarnermik soqutiginninnera pillugu nutaarsiassat Mari Kleist eqqarsalersippaat.

Ilisimatusarfiulli USA-mit nalinginnaasumit saaffiginninnerusoqarsimasorinngilaa. 

Naak nutaanik suleqateqalernissamut nangaassuteqartaraluarlutik, rektorip tamanna tamatigut nalilersuinermik tunngaveqartarnera nassuiaatigaa.

- Oqariarta suleqativut Alaskamiittut inuit kulturiat pillugu ilisimatusarniarlutik aallartikkusuttut. Taamaappat pissutsit nalilersorlugillu misissussavagut. Issittumi universitetit allat nalinginnaasumik tatigaagut. Pissutsit ilimaginngisat amerlasinnaapput, amerlanertigullu aatsaat pileraangata misissortarpagut isummertarlutalu.

- Tunngaviusumilli misigaagut, pissutsit annerusumik minnerusumilluunniit nalinginnaasunngoriartuaartinnagit toqqissisimanartutullu naliliitinnata suleqatigiinnermik aallartitserusunnata.