Naalakkersuisoq: Ikiorsiissutit 25 procentimik apparlik inuusuttullu sulilernissaannut ikiorneqarlik
Jens-Frederik Nielsen naalakkersuisut ulluni 100-nngorsiortorneranut atatillugu KNR-imit apersorneqarpoq.
Tassanilu paatsuugassaanngitsumik oqariartuuteqarpoq: "Assagut atorlugit sulissaagut."
Taamaattumik naalakkersuisut suliffissarsiortutut nalunaarsoqqasunut, sulerusunngitsunut, ikiorsiissutit annikillinissaat siunnerfigaa.
Suliffeqarnermut Naalakkersuisup, Bentiaraq Ottosenip (A) suliffissarsiuussisarfimmiit suliffissatut innersuussamut naaggaartunut, ikiorsiissutinik qanoq annikillisaasoqassanersoq, maanna itisilerpaa.
- Imatut paasineqassaaq, suliffissaaleqisunut ikiorsiissutit 25 procentinik annikillinissaat misilillugu suliniutigissavarput. Siullermilli sussassarinnittut pingaarutillit oqaloqatigissavagut - kattuffiit soqutigisaqartullu allat.
Namminersortut peqataassapput
Amerlanerusunik sulilersitsinissaq anguniarlugu ikiorsiissutinik annikillisaanissap misilillugu suliniutiginissaa, naalakkersuisut kisiat sakkuginianngilaat.
Tamannami ilutigalugu inuiaqatigiinni namminersortut suliffeqarfiutaat qanimut suleqatigineqarnissaat kommunenut sakkortuumik kaammattutigivaat.
- Inuiaqatigiinni namminersortut suliffeqarfiutaat peqtaatinneqarnissaat pingaartitaraara tamannalu erseqqissarnikuuara, taakkuugajuppummi ineriartorluartitsisut, Bentiaraq Ottosen oqarpoq nangillunilu:
Tamannali Nunatsinni sumiiffinni assigiinngitsuni qanorpiaq pissanersoq naalakkersuisup oqaatigisinnaanngilaa. Tamanna susassaqaqatigiit assigiinngitsut oqaloqatigeqqaarnissaanik peqquteqarpoq.
- Suliffissaaleqisut ajunnginnerpaamik tapersersorneqarnissaat siunnersorneqarnissaallu anguniarlugu periuseq nutaaq aqqutissiuunniarsaraarput, sulineq imminut akilersinnaaniassammat.
Inuusuttut peqataassapput
Suliffissarsiortut 2024-mi nuna tamakkerlugu procentinngorlugu 2,95 procentimiit 3,3 procentimut qaffariarsimavoq. Tamanna naalakkersuisut 2025-mut aningaasaqarneq pillugu nassuiaataanni saqqummiunneqaqqammersumi takuneqarsinnaavoq.
Naak inuussutissarsiornerup iluani suli amerlanerusunik sulisussarsiortoqaraluartoq, illoqarfiit annersaanni pingasuni suliffissarsiortut ukioq kingulleq 15 procentimik amerleriarput.
Pingaartumillu inuusuttut naatsorsueqqissaartarfiup kisitsisaataanni amerlapput. Tassani ilinniagaqalersimanngitsut sulinngitsullu ataatsimut isigalugit 30 procentiupput - kisitsisinili inuusuttut ukioqatigiiaani Majoriamiittut ilanngunneqarsimapput. Taakku 30 procentini pineqartuni 5 procentiupput.
Taamaattumik Bentiaraq Ottosenip suliffeqarfiutillit namminersortut inusuttunik isumaginneqataatikkusuppai.
- Maanna inuusuttut sulilernissaminnut piareeqqasut maani nunami sulilernissaat maanna isigisassaraarput. Sulisussaqarnerulernissamut aqqut inuusuttuniippoq taamaattumik taakku isiginiagassaraagut, naalakkersuisoq oqarpoq nangillunilu:
- Assersuutigalugu inuusuttup suliffissarsiortup ilinniartunngornissani suliffeqarfimmiiginnarnissaniluunniit periarfissarisinnaavaa - taamaaliornikkut periarfissanik nutaanik ammaassisoqassaaq.
