Avannaata borgmesteria: - Inuit suliumanatik nammineerlutik oqaannarput

- Sulisinnaasut sulissapput.

Naalakkersuisut siulittaasuata, Jens-Frederik Nielsenip (D) KNR-imut juulip qiteqqunnerani oqaatigaa. Taanna Avannaata Kommuniani borgmesterimit maanna taperserneqarpoq.

Naak assersuutigalugu Ilulissani sulisussaaleqisoqaraluartoq arlallit kommunit suliffissaminnik neqeroorfigineqaraluaraangamik qujaannartartut, Lars Erik Gabrielsenip (S) maluginiarpaa.

Taassuma tamanna tusagassiuutinut nalunaarummi allappaa.

- Taamaakkaluartoq kommunimi misigiuarparput, inuit suliffissarsiortunut ikiorsiissutinik tigusartagaqartut, suliffissamut innersuunneqartumut iluamik tunngavissaqaratik qujaannartartut, taamaakkaluartorli ikiorsiissutit affaannik tigumminniinnartartut.

Pinngitsaaliissutaanngitsoq

Naatsorsueqqissaartarfiup kisitsisaataasa inuit 1.600-t missaanniittut maanna suliffeqanngitsut takutippaat.

Naalakkersuisut suliffissarsiortunut aningaasartuutit appartikkusukkaat Jens-Frederik Nielsenip oqaatigaa. Tamanna sulilernissamut kajuminnerulersitsissaaq.

KNR-ip Sulinermik Inuussutissarsiuteqartut Kattuffiata (SIK) siulittaasua, Jess G. Berthelsen sapaatip akunnerata siuliani oqaloqatigaa. Taassuma aningaasartuutinik appaaniarneq pisariaqanngitsumik pinngitsaaliinerusoraa.

Jess G. Berthelsenip sulisinnaasut tamarmik sulisinnaagunik sulerusunnerarpai. Kikkulli tamarmik sulissaqarnissaannut nunap ilusilersugaanera unammillernartoqartitsivoq.

Lars Erik Gabrielsenilli kommunimi sulisinnaagaluarlutik sulerusunngitsut arlaqartut misigiuaritsik oqaatigaa.

- Kisianni pinngitsaaliiniarneq matumani pineqarani, akisussaaffik eqqartorneqarpoq. Inuiaqatigiittut akissaqanngilagut suliffissaaleqisut periarfissaqartillutik nammineq qinikkaminnik suliumanngitsut ikiorsissallugit, taanna tusagassiuutinut nalunaarummi allappoq.

 Ruuba eqiatsitaartoq kalaaleq

Lars Erik Gabrielsenip suliffiit soorlu aalisakkeriffik imaluunniit akunnittarfinni eqqiaasut suliffissaaleqisut suliffigerusunngikkaat allappaa.

- Napparsimasut imaluunniit inuit ajornartorsiortut oqaluuserineqanngillat. Oqaluuserivagut inuit, sulilernissaminnut piareersimasut, nammineerlutillu oqaannartut aalisakkerivimmi imaluunniit akunnittarfimmi eqqiaasutut suliumanatik. Tamanna sulinnginnissamut utoqqatsissutaasinnaanngilaq.

Taamaammat pissutsit Danmarkimut 2012-imi oqallinnermut ”Dovne Robert”-imut tassa Ruuba eqiatsitaartumut sanilliuppai. Tassani angut sulinani ikiorsiissutinik pisartagaqaannarniartoq pineqarpoq.

Lars Erik Gabrielsenip tamanna suliffissarsiortup suliffimmut qujaannarluni annikinnerusunik – kisianni inuussutigineqarsinnaasunik pisartagaqarnerani pinngortarnerarpaa.

- Taamaalilluni taaguut ”Dovne Robert” (Ruuba eqiatsitaartoq aaqq.) nunatsinni saqqummeriataarpoq. 

Naalakkersuisulli inatsimmik allannguisariaqanngissorai. Atorfillilli naalakkersuisullu inatsimmik sukannernerusumik paasinnittariaqarsorai.

- Suliffissaq innersuunneqartoq tunngavissaqarani itigartikkaanni, taava tassa nammineq pisuussutiginagu suliffissaaleqisutut taaneqarsinnaajunnaassaaq, taamalu ikiorsiissutinik pisinnaatitaaffeqarunnaassalluni, Lars Erik Gabrielsen allappoq.