GME pasinapilunngilaq

- Kronikkiliarineqarsimasoq atuarlugu pakatsinaqaaq, danskit aviisisa ilaanni Informationimi avatangiisinik illersuiniaqatigiit assigiinngitsut aamma Folketingimuyt ilaasortap Inuit Ataqatigiinneersup Johan Lund Olsenip allaaserisaannut akissuteqaluni Roderick McIllree e-mailikkut taama allappoq.

Kronikki novembarip 28-iani aviisimi saqqummerpoq, tassanilu allaaserinnittut arfiniliusut Greenland Minerals and Energy sakkortuumik isornartorsiorpaat.

Ilaatigut allaaserineqarpoq suliffeqarfik ilisimaneqarpallaanngitsumit tunngavilerneqarsimasoq. Aamma kronikkimi atiatigut taaneqanngilaq. Taannagooq Somaliap pigisaani Puntlandimi ujajaasoqartarneranut akuuvoq, assigiinngitsunik qulingiluanik atilersorluni suliffeqarfinnik arlalinnik nunarsuaq tamaat pigisaqarluni, nassaariuminaatsupilussuulluni kiisalu akerleriissutini eqqartuussivikkoortinneqartuni italiamiut, australiamullu mafiaat ikiortigisarai.

- Kronikki taatsiaannakkanik arliannik pasilliutinillu eqqunngitsunik arlalinnik imaqarpoq, GME-mik tunngavileeqataasoq GME-milu pisortaq Roderick McIllree Radioaviisimut taama allappoq.

Taanna aamma allappoq Simon Cato aamma Jeremy Whybrow, namminertut australiamiuusut peqatigalugit suliffeqarfik tunngavilersimallugu.

Aammattaaq Public Companies Act innersuussutigaa, tassani suliffeqarfimmut piginneqataassutillit annerit 20-t allassimammata.

Angutip kronikkimi atiatigut taaneqanngitsoq aamma ilumoortortaqannginnerarpaa.

- Kronikkimi alapput inuk suliffeqarfiup pisortaanut peqataasimanngisaannartoq aamma Somaliami ujajaanermik suliaqartuusoq. Pineqartoq Greenland Minerals and Energymi piginneqataasimanngisaannarpoq, Roderick McIllree erseqqissaavoq.

GME 2006-imiili Kuannersuarni qilleraluni misissuisimavoq aammalu annetuumik misissuillunilu inerisaasimalluni, maannamullu 500 mio. koruunit atorsimallugit, Roderick McIllree paasissutissiivoq.