Gas ukiuni sisamangajanni akisunerpaaffimminiittoq

Gasip akia ukiup ataatsip ingerlanerani marloriaammik akitsorpoq, maannalu 2022-p naaneraniilli aatsaat taama akisutigaaq. 

Hollandimi gasimik nioqquteqartarfimmi TTF-imi gasip akia megawatttimemut 73 eurot missaannik akilerlugu nioqqutaavoq.

Tamanna Iranip USA-llu akornanni Kangiani Qiterlermi sorsunnerup kingunerisaanik nukissiuutit assigiinngitsut akitsoraluttuinnarnerannik ilaatigut pissuteqarpoq. 

Taama oqarpoq Kristian Rune Poulsen, Green Power Denmarkimi siunnersortitut pisortaq nukissiuutinillu misissuisartoq.

- Sorsunneq avaqqunneqarsinnaanngilaq, taanna gasip akiata qaffanneranut pissutaasoq pillugu oqarpoq.

- Aammali ukioq qiianakujuttoq misiginikuusarput tamatumalu kingunerisaanik gasimut toqqorsiviit imaarneqarpajaarsimasut kingumut qiviaannarsinnaavagut. Ukiut 15-it kingulliit ingerlaneranni imaarutingajaveqqapput.

Tomme lagrer tvinger prisen op

Europami nunat Kangia Qiterlermi sorsunnerup februaarip naanerani aallartinnerata kingorna, gasip akiata qaffannerata kingunerisaanik toqqorsivinnik immeeqqinnissaminnut utaqqipput, taanna nassuiaavoq. 
Ilaatigut sorsunnerup qanittukkut naammassinissaa ilimagigaluaramikku.

Taamaattoqanngimmalli aasap ingerlanerani gasinut toqqorsiviit arriitsumik immersorneqartariaqalersimapput tamatumalu kingunerisaanik gas akitsorpoq, Kristian Rune Poulsen nassuiaavoq.

Maannakkut Europami gassit toqqorsivii 65 procentit missaannik imaqarput.Ukiup taamaalinerani nalinginnaasumik 80 procentimik imaqartaraluarput.

Gasip annikinnerunera pissutigalugu nukissiuutinik misissueqqissaartartup gasip akia nunarsuarmi politikkimit qaammatini tulliuttuni sunnertianerunissaa naatsorsuutigaa. 

Inuiaqatigiittulli gasip akitsorneranut siornatigornit akiuulluarsinnaaneruvugut. 

- Europami gasimik atuinerput 2021-mili 15-20 procentinik appartipparput. Gas suli pisariaqartipparput, siornatigorniilli annikinnerusumik.

- Tamaani kissarsuutit gasimik ikummatissallit 100.000-ingajannik siorna ajornartorsiornerup kingorna ikinnerulerput, taamaattumik atuisut eqqorneqartut ikinnerulerput. Biilillu innaallagiartortut hunnorujutuusindilikkuutaanik kingullermit amerlanerulernikuupput, taamaattumik tassuuna pakkersimaarpugut.

/ Ritzau