Jean-Noel Barrotimik ataatsimeeqateqarnermi Jens-Frederik Nielsenip (D) najuunnissaanik paasissutissaq pillugu nalunaaqutaq 13.20 nutarterneqarpoq.

Taassuma nunanut allanut tunngasunut ilisimatusarnermullu naalakkersuisoq Vivian Motzfeldt naapissavaa, sapaatiuppallu taakku marluullutik Hans Egedep illuani aqagu sapaammi nal. 09.45 tusagassiortunik katersuutitsinissaat naatsorsuutaavoq.

Taakku Parisimi maajimi naapereernikuupput.

Vivian Motzfeldt taamani oqarpoq: 

- Frankrig nunat tamat akornanni naapitsinissanik siunertalinni nunatut siullertut tikeraarparput, maanilu Naalakkersuisut sinnerlugit Frankrigip piffissami ajornarkusoorfiusumi tapersersuineranut qujaniarnerput oqaatigaara.

- Peqatigisaanillu EU-mik attaveqarnitta ineriartortinnissaanik, kiisalu nunat tamat akornanni suleqatigiinnitta ineriartortinnissaanik kissaateqarnitsinnik oqariartuut apuupparput. Oqaloqatigiinnerit suleqatigiinnerillu nunat assigiinnik naleqartitaqartigisatut ilisimasavut siulliullugit aallartitsiffigissavagut. Aatsitassarsiornermik aatsitassanillu qalluinermi peqataasinnaanermut periarfissaq, ingammik nunanik inatsisinik toqqammaveqarluni periutsinik, tamat oqartussaanerannik, innuttaminnillu pisussaaffimminnik eqqortitsinermik ileqqoqartunik oqaloqatigiissutigineqassapput, aatsitassanillu qalluineq pillugu suleqatigiinnissamut ammanitsinnik oqariartuut nassarpara.

Franskit umiarsuaat Garonne ulluni makkunani Nuummiippoq, ullumikkullu alakkarterneqarnissaminut ammajumaarluni.

Pilersaarutit malillugit naalakkersuisut siulittaasuat Jens-Frederik Nielsen (D) aamma Frankrigip nunanut allanut ministerianik ataatsimeeqateqarnissamut najuunnissaanik Nunanut allanut Ilisimatusarnermullu Naalakkersuisoqarfik KNR-imut ilisimatitsivoq.