Europamiut inuinnaat Ruslandip assigiinngitsutigut saassussinerani toqutaanissaat ernummatigigaat
Ruslandip EU-mi nunanut saassussinini unitsinnavianngilai. Tamanna isertortumik paasiniaasartut nalunaarutaat arlallit tunngavigalugit, Bruxellesimi ilimagineqarpoq.
Taamaattumik EU-mi nunat qanoq iliornikkut navianartoq tamanna akiorneqassanersoq, maanna oqallisigaat.
EU-mi nunanut allanut tunngasunut pisortaq, Kaja Kallas, ataasinngornermi Bruxellesimi EU-mi illersornissamut ministerit ataatsimiinnissaat sioqqullugu taama oqarpoq.
- Eqqumasariaqarpugut, Rusland innuttaaqatigiinnik avissaartuutsitsiniarluni Ukrainemullu ikiuiniarunnaarsinniarluta, tamat oqartussaaqataanerannik aserorterinissaminik saassussinissaminillu sioorasaarniarluni pilersaaruteqartoq, isertortumik paasiniaasartut nalunaarusiaanni takugatsigu.
- Sioorasaarneqarnermut akiuuttariaqarpugut. Paasissutissanillu tigummisaqartilluta saassussinissaq sioqqullugu iliuuseqartariaqarpugut, Kaja Kallas oqarpoq.
Suleqatigiinneq
Tamanna EU-mi Kommissionip siulittaasuata Ursula von der Leyenip siunnersuutaa, isumannaallisaanermut tunngatillugu pisariaqartitsisoqartillugu isumaqatigiissut nutaaq tunngavigalugu pissasoq, taassuma erseqqissaatigaa.
Siunnersuut tamanna von der Leyenip septembarimi oqalugiaammini saqqummiuppaa. Von der Leyen siunnersuut pillugu ima oqarpoq:
- Europap nammineq immikkoortup sisamaannik imaluunniit ajornartoortoqartillugu isumannaallisaanermut isumaqatigiissummik, peqalernissaanut piffissanngorsimavoq.
- Nunap ilaasortaasup ataatsip taanna atulersippagu, nunat ilaasortaasut tamarmik suleqatigiissapput. Europami iliuuseqarneq ataqatigiissaarneqassaaq, ajornartorsiut ingasatsikkiartuinnarnissaa pinngitsoortinniarlugu kingunerilu annikillisinniarlugit, von der Leyen oqalugiarnermini oqarpoq.
Russit Europami ajoqusiiniarneri, internetikkut saassussiniarnerat assigiinngitsutigullu saassussinerat, suliniuteqarnikkut akiorniarsarineqassaaq.
Siooranartoq akiorniarsariniaraa
Russit sakkutuuisa umiarsuaanniittut illersornissaqafiup qulimiguuliutaasa ilaannut Fennec-imut, 10-15 meterisut ungasitsigisumittup tungaanut ajunaalernermi qummoroortartumik qanittumi qummoroortitsipput.
Ruslandip assigiinngitsutigut saassussineri unitsinneqanngippata, Europamiunik toqutsinissaa, Bruxellesimi ernumagineqangaarpoq.
Tamanna nunanut ilaasortaasunut ataasiakkaanut, EU-mut Natomullu ilungersunartorsiortitsissaq. Ilami Rusland toqumik inguneqartumik saassussippat, taava qanoq akinissaq eqqortuussava?
- EU-mi saassussinerit assigiinngitsutigullu saassussinernut periusissaq annertunerusoq oqaluuserissavagut, Kaja Kallas oqarpoq.
Tamannalu ilutigalugu Europami nunat, Ruslandip aarlerinartorsiortitsinera unitsinniarlugu iliuuseqangaarsimasimanerat aamma erseqqissaatigaa.
- Akiuussinnaassuserput nakussatsinniarlugu iliuuseqarnerusimanitta paasineqarnissaa pingaaruteqarpoq. Nunat ilaasortaasut naalagaaffimmi tunisat ataatsimut nalingisa 2,2 procentii illersornissamut maanna atorpaat. Taamaattumik tamanna anusinngorsaataavoq, Kaja Kallas oqarpoq.
RITZAU
