Ukiuni 20-ngajanni oqallisaareersorlu: Imigassaq pillugu politikkiliornissaq suli ullulerneqanngilaq
Imigassaq pillugu politikkiliornissaq ukiuni 20-ngajanni oqallisigineqareersorlu suliarineqalernissaa suli ullulerneqanngilaq. Peqqissutsimut Inunnullu Innarluutilinnut Naalakkersuisoq Anna Wangenheim KNR-imut allakkamini taama paasissutissiivoq.
Allattoq Jonna Enoksen Dahl
septembarip 28-at 2026 11:29
Ukiut 20-t qaangiupput.
Politikerit imigassamut aalakoornartulimmut tunngatillugu politikkeqalernissaa ukiuni 20-ni oqaluuseraat. Sulili iliuuseqartoqanngilaq.
Nuna tamakkerlugu imigassaq pillugu politikkissaq Naalakkersuinikkut Ataqatigiissaarisooqatigiit aggustimi ataatsimiissutigigaat, naalakkersuisup Anna Wangenheimip (D) KNR-imut oqaatigaa.
Aamma tamatumunnga politikkiliornissamut atatillugu kommuni ataaseq misileraaffiujumalluni nalunaartoq, taanna ilisimatitsivoq.
- Kommuni taanna politikkip atuutilernissaanut suleriaqqissaaq, Naalakkersuisoq oqarpoq.
Kommuni sorleq imigassamut aalakoornartulimmut politikkissamut tunngasumik misileraaffiussanersoq sunalu misilerarneqassanersoq oqaatiginngilaa, tamanna kingusinnerusukkut nalunaarutiumaarlugu allalluni.
Kommunit tallimaasut KNR-imiit tallimanngornermi attaveqarfigaagut, ilanngutassialli suliarinerani akissutissarsinata.
Ataatsimoorussamilli politikkeqartariaqarneq ima oqaasertalerpaa:
-Imigassap aalakoornartullip inuiaqatigiinni ajortumik kinguneqartitsisinnaasarmat kommunit ulluinnarni tamakkuninnga suliaqartarput. Inuiaqatigiit toqqissisimanissaat, tassani meeqqat inersimasullu imigassamit aalakoornartulimmit innarlerneqannginnissaasa anguniarneranut atatillugu kommunit qitiusumik suleqatigineqassapput.
Inatsisartut upernaaq manna ataatsimiinneranni Meeqqat pisinnaatitaaffii pingaarnertut tunngavigalugit nuna tamakkerlugu imigassaq pillugu politikimik kalaallit ineriartortitsisoqartariaqarnersoq Inatsisartunut ilaasortap Nivi Rosingip (IA) oqallinnissamik siunnersuutigaa.
Oqallinnermilu imigassamut aalakoornartortalimmut tunngasuni suliassaqarfimmi nutarterisoqarnissaa pisariaqartoq partiiniit tamanit oqariartuutigineqarpoq.
Tamannalu isumaqatigalugu naalakkersuisup tallimanngormat naqissuseqqippaa:
-Ajortoqarnissaanut pinaveersaartitsisumik inuillu imigassamit aalakoornartulimmit eqqugaasut tapersersornissaannut ataatsimoorussamik siunissamullu ungasinnerusumut suliniuteqarnissaq pisariaqarpoq.
Imigassaq aalakoornartulik pillugu manna isumaqatigiissusiornissaq tullinnguuppoq:
-Suliaqartut innersuussutaat inatsisartunut tunniunneqarnikut tunngavigalugit nuna tamakkerlugu imigassaq aalakoornartulik pillugu isumaqatigiissut suliarineqassaaq, isumaqatigiissullu siunissami nuna tamakkerlugu isumaqatigiissutissami sinaakkutissalersuissaaq, Anna Wangenheim oqarpoq.
Imigassaq pillugu politikkissaq qaqugu naammassineqassanersoq suli ullulerneqanngilaq. Naalakkersuisulli ukioq manna isumaqatiginninniartoqarnissaa naatsorsuutigalugu KNR-imut allappoq.
- Nuna tamakkerlugu imigassaq aalakoornartulik pillugu isumaqatigiissusiortoqareerpat nuna tamakkerlugu imigassaq aalakoornartulik pillugu politikkimik nutaamik aatsaat aallartisaasoqassasoq kingulliullugu allappaa, kommuninilu tallimani ataaseq misileraaffiusinnaasutut imminut nalunaarutigisimammat nuannaarutigalugu erseqqissarpaa.
