Eqqartuussisooqataasartut amigaataaqaat

Eqqartuussisooqataasartut amerliumallugit suliniut iluatsissasoq Kalaallit Nunaanni Eqqartuusivimmi pisortamut tullersorti neriuppoq.

- Eqqartuussisooqataasartut inuiaqatigiinni inatsisit tunngavigalugit ingerlasuni pingaaruteqaqaat. Taakkumi pinerlussimanermik sulianut suleqataasassasut Inatsimmi tunngaviusumi aalajangersagaavoq, Lars Christian Sinkbæk oqarpoq.

Eqqartuussisooqataasartut nunatsinni suliaat katillugit 1000-it sinneqalaartut ukiuni kingullerni suliarineqarput. Sulianullu naapertuuttunik sulisoqassappat eqqartuusseqataasartut 500-t pisariaqartinneqarput. Maannali 230-iinnapput.

Eqqartuussisooqataasartuuneq saniatigooralugu suliffiuvoq, aggersarneqartillunilu innuttaaqataasutut pisussaasutut sulinngikkallartoqartarpoq.

Aggersarneqartarnerit ukiumut sisamat arfillillu akornaniittarnissaat siunertaagaluartoq amigaateqartoqarnerani amerlanerusinnaasarput.

- Suliat ulloq naallugu ulluniluunniit arlalinni suliarineqarsinnaasarput. Taamaaligaangallu sulisitsisup sulisuni ulluni arlalikkaani amigaatigisinnaasarpaa, Lars Christian Sinkbæk oqarpoq.

2009-mi eqqartuusseqataasartuulersup Aviaaja Rosingip tamanna ilisarilluarsinnaavaa:

- Assigiinneq ajorput. Ilaannikkut qaammammut arlaleriartarpunga, Aviâja Rosing oqarpoq.

Eqqartuussisooqataasartut inuiaqatigiit agguataarnerannut ersiutaasussaapput, assigiinngitsunik ukioqqortussusillit assigiinngitsunillu inuussutissarsiutillit pisariaqartinneqartut, Lars-Christian Sinkbæk oqarpoq.

 - Ilinniartut, perorsaasut, taxartitsisut, iffiortut, aalisartut ilinniartitsisulluusinnaapput. Eqqartuussisooqataasartuunissamut killilersuutitakeqaaq, Lars Christian Sinkbæk oqarpoq,

Eqqartuunneqarsimasuunnginnissaq pineqaatissinneqarsimasutullu allagartaqannginnissaq aamma piumasaqaataapput.