Dronning Margrethe nunatsinnut attuumassutilinnik saqqummersitsinermik ammaasoq

Nunatta Dronning Magrethemut tunissutaasa ilaat, tassa kuultimik nunatsinneersumik niaqorutaasaliaq rubinimillu tipigissaataasiveeraliaq, 'Rocks of Greenland - Kalaallit Nunaat Rocks'-imik taallugu saqqummersitsinermi takusarneqarsinnaasunut ilaapput.

Allattoq Rune Hvistendal Kristiansen

juunip 21-at 2023 10:32

Nutserisoq Hanne Petersen

Nunarput erlinnartunik nalituunillu soorlu kuultimik rubinimillu pisuussuteqarfissuuvoq.

’Rocks of Greenland – Kalaallit Nunaat Rocks’-imik taallugu saqqummersitsineq kusanartuliuanik katersugaataasivimmi Designmuseum Danmarkimi ullumi pingasunngornermi ammarpoq. Soorlu kuultimik rubinimillu nunatsinni piiaaffinneersunik pinnersaatiliat kusanartuliallu nalituut tassunga takusarneqarsinnaapput.

- Ilaatigut ujaqqanik kusanartuliat eqqumiitsuliallu aalajangersimasut Kalaallit Nunaanni piiaaviit ilaanneersunik sanaajusut kulturikkullu oqaluttuassartatsinnut pingaarutiliusut saqqummersippavut, katersugaasiviup pisortaa Anne-Louise Sommer oqarpoq.

Aamma atuaruk VIDEO Aappaluttumi sulineq nuannersoq

Designmuseum Danmarkimi Københavnip qiterpiaaniittumi saqqummersitat kuultimik rubinimillu nunatsinni piiaaviit ilaanneersuupput, tassa Aappaluttumeersuullutillu Nalunameersuupput.

Dronningi saqqummersitsinermik ammaasuusoq

Dronning Magrethep saqqummersitsineq Danmarkimi ullumi nalunaaqutaq ataatsimut ammarpaa.

Dronning Margrethep ammaanermi oqalugiaataa saqqummersitanut Kalaallit Nunaanniluunniit nammineq misigisaanut tunngasuussasoq, katersugaasiviup pisortaata eqqoriarpaa.

- Dronning Margrethe anersaaqarfigisaminut imalimmik saqqummersitsinermik ammaanermi oqalugiaateqakkajuppoq, Anne-Louise Sommer oqarpoq nangillunilu:

- Oqalugiarnissaa pissanngatigaarput.

Nunatta kunngikkormiunut tunissutaasa ilaat saqqummersitanut ilaasut

Nunatta dronning Margrethep droninngitut 2012-imi ukiut 40-nngortorsiorneranut tunissutai saqqummersitani alutornarnersanut ilaassasut, katersugaasiviup pisortaa aamma oqarpoq.

- Ataqqinartorsuup dronning Margrethep nioqorutaasani “Naasut” saqqummersitsinissamut atukkiuppaa.

SAQQUMMERSITAT PILLUGIT PAASISSUTISSAT

Nicola Appelip kuultimik ujaqqamillu pinnersaasiassamik nunatsinneersunik pinnersaasiai saqqummersitanut ilaapput.

Marriortup Kristine Kreutzmannip marriai rubimik seqummakumik qallikkat saqqummersitanut aamma ilaapput.

Aamma annoraaminiliortup Astrid Skibsted Holmip piiaavinni qaartiterutikunik sakkukunillu ikaartitigai saqqummersitanut aamma ilaapput.

Najoqqutaq: Danmarks Designmuseum

Kuultimik nunatsinneersumik niaqorutaasaliaq “Naasut” kuultimik pinnersaasiortup, Nicolai Appelip, sanaarivaa. Nunatta naasuisa assigiinngitsut ilaat 17-it nioqorutaasami tassani erserput.

Nunatta dronning Margrethemut dronningitut 2022-mi ukiut 50-inngortorsiornerani tunissutaa, tassa rubinimik nunatsinneersumik tipigissaataasiveeraliaq, Naalakkersuisut Inatsisartullu tunniuppaat.

Kalaallit Nunaat Rocks'-imik taallugu saqqummersitsineq pilllugu uani paasisaqarnerusinnaavutit.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.