Naaja H. Nathanielsen pineqaatissinneqarsimasut inissiisarfianni pissutsit pillugit: Akueriinnarneqarsinnaanngilaq

Nalunaarusiaq Europap Siunnersuisoqatigiivinit saqqummersinneqartumi Nuummi pineqaatinneqarsimasut isertitsiviani pissutsit isornartut qaqilertorneqarput. Isornartorsiuinerlu Inatsit Atuutsinneqarnerannut Naalakkersuisup, Naaja H. Nathanielsenip (IA) isumaqatigaa.

Nuummi pineqaatissinneqarsimasut inissiisarfianni pissutsit ernumanartillugit tusagassiuutinut nalunaarummini oqaatigaa.

- Ammasuni matoqqasunilu inissakilliorneq isornartorsioqqippara. Danskit naalakkersuisuisa sukkanerpaaq atorlugu aaqqiinissaat naatsorsuutigaara, Naaja H. Nathanielsen tusagassiuutinut nalunaarummini taama oqarpoq.

Taanna naapertorlugu isornartorsiuineq nutaarsiassaanngilaq, nunattali danskit naalakkersuisuinut ajornartorsiutit taakku ukiorpaalunni takutinniarnikuugaluaraat, taassuma uppernarsarpaa.

Isornartorsiuineq nalunnginneqarluartoq

Inissakilliornera pissutigalugu pineqaatissinneqarnerup tamakkiisumik ingerlanneqarnissaanut sunniuteqartartoq ataatsimiititaliamit isornartorsiorneqarpoq.

Inissakilliortoqarnera pissutigalugu arnat angutillu immikkoortinniarnissai ajornartarsimavoq assinganillu paarnaarussat eqqartuussallu immikkoortinniarnissaat ajornartarsimalluni.

- Amerlavallaanik isertitsivimmiittoqarnera akuersaarneqarsinnaanngilaq, sulisunummi isertitsivimmiittunullu sillimaniarneq, inatsisitigut isumannaatsuuneq atugarissaarnissamut eqquinerluppoq, Naaja H. Nathanielsen oqarpoq.

Pineqaatissinneqarsimasut isertitsiviani atugassarititaasut pillugit ataatsimiititaliamit ernummatiginninneq taassuma isumaqatigaa.

Periarfisseeqqinneq

Inissiisarfimmiittullu pinerlunnerit unitsillugit inuunerminni ingerlariaqqinnissamut tunngatillugu sulilernissaq sammisanulluunniit akuunissaannut periarfissakippallaartoq nalunaarusiami ilanngunneqarpoq.

Inissiisarfimmiittut naleqartitanut inuunerminnilu ingerlariaqqittarnissaat tapersersorneqartariaqartut, Naaja H. Nathanielsenip pingaartinnerarpaa. Taammaattumillu inunnut akuusaleqqinnissaq ukkanneqaannassasoq, taanna erseqqissaavoq.

- Nunatta pineqaatinneqarsimasut inissiisarfiani atugassarititaasut ajunngitsuunissaat tamatta angorusupparput. Tamannalu qulakkeerumallugu Naalakkersuisut danskit naalakkersuisuinut kimigiisernertik attatiinnassavaat, tusagassiuutinut nalunaarummi taanna oqarpoq.

Sulilersitsinermilu atugassarititaasut ajornartorsiutaasut qanganitsersimasullu, Naaja H. Nathanielsen isumaqarpoq. Ajornartorsiullu tamanna 2026-mi aaqqinneqassasoq taassuma naatsorsuutigaa.

Nalunaarusiaq tamakkiisoq uani atuarsinnaavat.