Danskit naalakkersuisuisa aningaasanut inatsisissatut siunnersuut isumannaallisaanermut tunngasoq saqqummiukkaat

Aningaasanut inatsisissatut siunnersuutaavoq "sukannersumik pingaarnersiuisoq“, isumannaallisaanermut aningaasat amerlanerusut, isumannaallisaanermut politikki maanna atuuttoq pissutigalugu, atorneqartariaqarmata.

Danskit aningaasaqarnermut ministeriat, Peter Hummelgaard (Socialdemokraterne), danskit naalakkersuisuisa aningaasanut inatsisissatut siunnersuutaannik Finansministeriami, Danmarkimi nalunaaqutaq malillugu tallimanngorpat ullaakkut saqqummiussisussaq, taama oqarpoq.

Siunnersuut ima qulequtaqarpoq "Danmarkimik illersuineq nukittunerusoq – Danmarkimik nukittunerusumik illersuinissaq“.

Naalakkersuisut illersornissamut aningaasanik naammattunik ilaatigut immikkoortitsiniarput, taamaalillutik nunap aningaasartuutaasa tamarmiusut 3,5 procentii illersornissamut 2030-mi atorneqarumaarmata.

Peter Hummelgaardip "Danmarkip aningaasaqarnera ingerlalluaqisutut" oqaatigaa.

- Akisussaaffimmik tigusinerput naalakkersuisut aningaasanut inatsisissatut siunnersuutaanni ersersinneqarpoq, aamma Danmarkip mingutsitsinnginnerunissaanik, kiffaanngissuseqarnerunissaanik naligiiffiunerulernissaanillu suliniuteqarnermi siuttuunerput, Peter Hummelgaard oqarpoq.

Aningaasaqarnermut nunamullu namminermut ministerip Pia Olsen Dyhrip (SF), aningaasanut inatsisissatut siunnersuut "sillimaniarnermut politikkimut tunngatillugu ilungersorfiunera“ malunnarnerarpaa.

- Aningaasanut inatsit una atorlugu Danmarkimi ilungersunartorsiorfiusut tamarmik aaqqinngilavut. Ingerlalluarpugulli.

- Isumaqarpunga aamma kikkut tamarmik eqqaamasariaqaraat isumannaallisaanikkut politikkikkut pissutsit ilungersunartut atugarigigut, Pia Olsen Dyhr tusagassiortunik katersortitsinermi oqarpoq.

Akileraartarnermut aaqqissuussineq pisariillisarneqartoq

Naalakkersuisut aningaasanut inatsisissatut siunnersuutaata annerpaartaa ilisimaneqareerpoq, suliniutimmi taakkua naalakkersuisut tunngavilersuutaannut ilaapput ministerinilluunniit assigiinngitsunit piffissami kingullermi saqqummiunneqartareerput.

Assersuutigalugu meeqqat 2027-mi atugarissaarnissaannut, ilaatigut meeqqat atuarfiannut, 1,2 milliardit koruunit immikkoortinneqarput, aningaasanullu inatsisissatut siunnersuummi aamma 2030-mi akileraarutinik ikililiinernut katillugit 10,1 milliardit koruunit immikkoortinneqarput.

Ilaatigut akileraarutaasartut ilaat aamma akileraartartut aningaasarsiornerpaat akileraarutaannik atorunnaarsitsinissaq kiisalu ingerlatseqatigiiffiit akileraarutigisartagaasa ikilineqarnissaat pineqarput.

- Akileraartarnermut aaqqissuussineq pisariillisarparput, akileraartarnermut ineriartortitsinermullu ministeri Jakob Engel-Schmidt (M) oqarpoq.

Akileraartarnermut tunngatillugu siunnersuutit akileraartarnermut tunngatillugu aaqqissuusseqqinnermi immikkoortumi isumaqatigiinniutigineqassaaq. Akileraarutinik ilanngaaserisoqarnissaa aningaasanut inatsisissatut siunnersuummi taamaallaat takuneqarsinnaavoq, naalakkersuisullu akileraarutit amerlanerpaaffissaannik allanngortitsisinnaajunnaarnissaq aamma pilersaarutigaat, tamannalu akileraarutinik ilasinerussaaq.

Ilinniartitaanerup tungaatigut nakussassaaneq

Tusagassiortunik katersortitsinermi ministerit kingullersaat, inuussutissarsiornermut unammillersinnaassusermullu ministerip Martin Lidegaardip (R), "inuusuttut ilinniartitaanerlu aningaasanut inatsisissatut siunnersuummi aningaasaliiffigineqarnissaat“ pingaartippaa.

- Danmarkimi ilisimasat, pissuserinneq ilinniarnerlu malunnaatilimmik nukittorsarniarpagut, abc-miit ph.d.-mut. Tamanna inuusuttunut ataasiakkaanut iluaqutaavoq, aammali Danmarkip siunissaanut iluaqutaalluni, Martin Lidegaard oqarpoq.

Aningaasanut ukiuni kingullerni inatsisip ilarujussua aningaasaqarnermut politikki tunngavigalugu aningaasaliiffigineqarsinnaasimavoq, aningaasanulli inatsisissatut siunnersuummi arlalitsigut aningaasaliinissamut suliniuteqarpoq.

Tamanna ilinniartut akissarsiaasa ikilineqartariaqarnissaannik, utoqqalinersiutit sipaarneqartariaqarnerannik, umiarsuarnut takornariartaatinut akitsuusersuisoqartariaqarneranik aamma naalagaaffiup allaffissornerani sipaarniuteqartariaqartoqarneranik  ilaatigut kinguneqassaaq.

Naalakkersuisut 2027-mut aningaasanut inatsisissaq nutaamut tunngatillugu amerlanerussuteqalerumallutik, Folketingimi partiit sinneri maanna isumaqatiginiassavaat.

Partiit allat pingaartitaannik naammassinnissinnaaqqullugit, isumaqatiginninniarnernut taakkununnga 2027-miit 2030-mut ukiumut 500 million koruunit immikkoortinneqarput.

RITZAU