Danmarkip eskadrilleutaata pisoqaanersap ukiuni 100-nngortorsiorneranut atatillugu timmisartorneq

Sakkutuut timmisartuat Eskadrille 721 ataasinngornermi ukiuni 100-nngortorsiorpoq tamannalu Danmark timmisartoqarfiilu qulaavaallugit timmisartortoqassaaq.  

Illersornissaqarfiup timmisartuussisartua Air Transport Wing Facebookikkut tamanna pillugu allappoq.

Eskadrille tassaavoq sakkutuut timmisartortartuini immikkoortortaq tassanilu timmisartut 10-t 20-llu missaanniikkajuttarput. 

Eskadrille 721 1926-mi pilersinneqartoq Danmarkimi taama ittuni pisoqaanersaavoq, Air Transport Wingillu paasissutissiineratut nunarsuarmi suli atorneqartartuni pisoqaanersaat ilaanniippoq. 

Nalliuttorsiutiginnilluni timmisartorneq Flyvestation Aalborgimiit, eskadrillep inissisimaffianiit, ataasinngornermi ullaakkut nalunaaqutaq 08.40 aallartinneqassaaq. 

Timmisartorneq Flyvestation Skalstrupimi Roskildemiittumi nalunaaquttap 10.35 missaani naammassineqassaaq.

Kangerlussuarmiitinneqartartoq

Eskadrillep timmisartui marluk Challengeri Herculesilu timmissapput. 

Challengeri ilaasartaataavoq kunngikkormiunillu aamma naalakkersuisunik ilaatigut angallassisartoq.

Hercules assartuutaavoq 20 tonsillu missaannik assartuisinnaasoq. 

Hercules aarluarsuttut sululittut kusassarneqarsimassaaq tamannalu immikkoortortami eskadrillep ilisarnaatigaa. 

Timmisartut danskit illoqarfii arlallit qulaavaassavaat Helsingørimilu Kronborgi aamma Københavnimi Amalienborgi aamma qulaallugit timmissallutik. 

Timmisartorneq nalliuttorsiutiginninnerussaaq sakkutuunullu sungiusarnerulluni, Air Transport Wing allappoq. 

Eskadrille 721-p timmisartui nunani tamalaani suliaqarnerni atorneqakkajuttarnera Illersornissaqarfiup nittartakkamini allassimavaa. 

Immikkoortortap timmisartuisa ilaat qaammammut ullut qulit missaannik aamma Kangerlussuarmiittarpoq. 

RITZAU