Borgmesterit akileraarnikinnerusalernissaq illersoraat
Kommune Kujallermiut ataatsimik procentimik akileraarnikinnerusalilernissaannik siunnersuut kommunalbestyrelsiisa akueraat, Kommune Qeqertalimmiullu procentpointinik marlunnik akileraarnikinnerusalernissaannik siunnersuut kommunalbestyrelsiisa aamma akueraat.
Kommunimut akileraarnikinnerusalerneq atugarissaarnissamut aningaasartuutikinnerulernermik kinguneqassangatinnarsinnaavoq. Taamaattoqarnavianngitsorli, Kommune Kujallerup borgmesteria Stine Egede (IA) oqarpoq. Kommune Kujallermiut 2024-milu akileraarnikinnerusalernissaat inuunermi atugaasa ajornerulernerannik kinguneqarnavianngitsoq, taassuma aaamma neriorsuutigaa.
Taassuma missingersuutinut inatsit Inatsisartut 2016-imi akuerisaat 2021-milu atuutilertoq innersuussutigaa.
Missingersuutinut inatsit aalangiisuusoq
Missingersuutinut inatsit kommunit sinneqartooruteqaraluartut sullissinermut, soorlu meeqqerivinni meeraaqqerivinnilu perorsaasutut atorfinnik amerlassusiliinermut, aamma sanaartornermut, qanoq aningaasartuuteqarsinnaatiginerannik aalajangiisuusarpoq.
Kommunit ukiuni sisamani qinigaaffiup ingerlanerani procentinik marlunnit amerlanerunngitsunik siuariartortitsisinnaatitaapput. Tassa sinneqartoorutiminnik atueriaannaatitaanngillat.
- Aningaasaativut aningaaserivimmiitiinnarnerininngarnit inuiaqatiginni atorneqarunik pitsaaneruvoq, borgmesteri Stine Egede oqarpoq.
Procentpointinilli marlunnik akileraarnikinnerulersitsinissi orniginartissimanngikkini, taanna erseqqissaavoq.
Kommune Kujalleq aatsitassarsiorfiuleruttorfiunerta mittarfiliorfiuleruttorneratalu ilutigisaanik missingersuutitigut 14,3 millionit koruuninik massakkorpiaq sinneqartooruteqarpoq.
- Procentpointinik marlunnik akileraarnikinnerusalertitsigaluarutta, soorunami sinneqartoorutikinnerulissaagut. Taamaammat mianersorusunneruvunga.
Akileraarutitigut isertitaqarneruleriartortoq
Kommune Qeqertaliulli borgmesteria, Ane Hansen, taama mianersortiginngilaq. Kommunertik piginneqatigiiffinnit angerlarsimaffissatut orniginartinneqarnerulernissaa inuttunerulernissaalu taassuma anguniagaritoqaraa. Kommune Qeqertalik najugaqarfikkuminartuussasasoq procentinillu marlunnik akileraarnikinnerusalilertitsisussanngornertik tamatumunnga sunniuteqaqataassasoq neriuutigigitsik, taanna nassuiaavoq:
- takusartakkavut malillugit atorfillit ingammik ilinniarsimasut nuttartarput kommuninut akileraarutikinneruffiusunut. Taanna takunikuuarput, Kommuneqarfik Sermersooq Qeqqata Kommunialu ornigineqartartut, taakkua akileraarutaat uagutsinninngarnit appasinnerumata.
Taamatut kinguneqassasoq neriuutigitsik qulakkeeqqanaguli, Ane Hansenip nassuerutigaa. Aammali ima oqarpoq:
- Sapiiserneq politikeritut aamma ilaannikkut pisariaqarpoq.
Akileraarnikinnerusalertitsinissartik kommunimi atugarissaarnikinnerulernermik kinguneqarnavianngitsoq, taanna Kommune Kujallerup bormesteria assigalugu aamma oqarpoq.
- Atugarissaarnikinnerusoqalinnginnissaa qularnaarparput. Taamaammat kommunimut akileraarut apparparput. Ukioq mannami akileraarutitigut isertitaqarneruvugut, aamma aappaagu taamaassaaq, kommunitsinnilu sulisussaaleqisoqarpiarnani, taanna oqarpoq.
Kommune Qeqertalimmiut kommunimut 28 procentiniit 26 procentinut akileraarnikinnerusalissammata tassani akileraarut taamaalilluni 44 procentiujunnaarluni 43 procentinngussaaq. Kommune Kujallermiut kommunimut 28 procentiniit 27 procentinut akileraarnikinnerusalissapput, tassanilu akileraarut taamaalilluni 44 procentiujunnaarluni 43 procentinngussaaq.
