Kujalleq: Procentimik ataatsimik akileraarnikinnerusalilerpugut

Kommune Kujallermiut procentimik ataatsimik akileraarnikinnerusalilerput. Tamanna kommunalbestyrelsip 2024-mut missingersuutit pillugit isumaqatiginninniarnerani tamarmik akuersissutigaat.
Kommune Kujallermiut 2024-mi akileraarnikinnerusalilerput. Assi © : Kommune Kujalleq
novembarip 30-at 2023 15:22

Kommune Kujallermiut akileraarnikinnerusalertussanngorput. Tassami  procentimik ataatsimik kommunimut 2024-imi akileraarnikinnerusalilerput.

Kommune Kujalleq tusagassiutinut taama nalunaarpoq.

Tassa Kommune Kujallermiut kommunimut 28 procentiniit 27 procentinut akileraarnikinnerusalilerput. Kommune Kujallermi akileraarut taamaalilluni 44 procentiujunnaarluni 43 procentinngussaaq.

Suliniuteqartoq

Borgmester Stine Egede missingersuutit nutaat pillugit ima oqarpoq:

- Ilaasortat tamarmik akileraarutip appartinneqarnissaanut isumaqataanerat, pitsaanerusumik ingerlatsinerup kiisalu kommunitsinni siusinaartumik iliuuseqartarnissap taama annertutigisumik isiginiarneqarnerat assorsuaq nuannaarutigaakka.

Isumaginnittoqarfik eqqarsaatigalugu meeqqat inuusuttuaqqallu siusinaartumik suliniarfigineqarnerisa nukittorsarneqarnerinut aningaasanik amerlanerusunik atugassanngortitsisoqarpoq kiisalu innarluutillit atugaat pitsanngorsarneqassallutik.

Nanortalimmi ilaatigut paaqqinnittarfiliornissaq kuuffilersuinissarlu Qaqortumilu aqqusinernik asfalterinissaq Qaqortumilu Qummumi sanaartorfigissaanissaq pingaarnerutillugit aningaasaliiffigineqarput.

Suliniutaali taakkuinnaanngillat. Kommunalbestyrelsimmi borgmesterip Stine Egedep Qaqortumi paaqqinnittarfiliornissamik utoqqarnut inissialiornissamik taavalu Narsami Nanortalimmilu sulisinut inissialiornissamik suliniutinut tulliuttunut atugassanik kommuninut taarsigassarsisitsisarfimmiit taarsigassarsiniarnissamik periarfissarsiornissamik piginnaatippaa.

Tamatuma saniatigut atuarfiit, paaqqinnittarfiit, kulturilerisut sunngiffimmilu sammisassaqartitsisut Majoriallu aqutsisuinik piginnaanngorsaanissamut kommunalbestyrelse aamma aningaasaliivoq.

Aamma timersortarfiit pinnguartarfiillu nutarterneqarnissaasa sallinngortinniarneqarnissaannik 2024-imi pilersaarusiortoqassasoq, aamma Qaqortumi nutaamik allaffeqarfiliortitsineq sutigut pitsaaquteqarnissaanik tamatumunngalu qanoq aningaasalersuisoqarnissaanik misissuisoqassasoq, kommunalbestyrelsimi isumaqatigiissutaavoq.