Kommune Qeqertalimmi inuit aningaasassaqarnerulersut
Kommune Qeqertalimmi kommunalbestyrelsip kommunimi akileraarut aappaagumit 2 procentpointimik apparniarlugu aalajangerpaa.
Kommunimut akileraarut 28 procentimiit 26 procentimut apparneqassaaq. Innuttaasut taamaalillutik akileraarutaat ataatsimoortoq 42 procentiinnanngussalluni.
Kommune tusagassiuutinut nalunaarummi allappoq.
Coronap nunarsuarmi tamarmi 2020-mi tuniluunnera aamma Ukrainemi sorsunnerup 2022-mi aallartinnera pissutigalugit nunatsinni sumiiffiit ilaanni inuussutissat akii qaffangaatsiarput.
Taamaammat kommunip innuttaasuni pitsaanerusumik atugassaqartinniarlugit kommunimut akileraarut apparniarlugu aalajangerpaa.
Royal Arctic Linep assartuinermut akit qaffanneqarnissaanik nalunaarutiginninnerata kingorna niuertarfiit inuussutissat akii aamma akitsoqqikkumaartut aarlerisaarutigaa.
Kommune Qeqertaliup Inatsisartut innuttaasunut aningaasaateqannginnerpaanut ikiuutaasussamik akileraarnermut aaqqissuusseqqinnissaat neriuutigalugu akileraarut apparpaa
Upalungaarsimanermut aqqusinernullu aningaasat
Kommune Qeqertaliup 2024-mut missingersuutinik akuersineranut atatillugu akileraarutinik appaasoqarpoq.
Kommunip tamatuma saniatigut upalungaarsimanermut aningaasanik immikkoortitsinissaq aamma akuersissutigaa, taamaalilluni atortuutitik ingerlaavartumik nutarterneqarsinnaalissallutik.
Aamma Kangaatsiami, Ikamiuni Ikerasaarsummilu aqquserngit iluarsartuunnissaannut aningaasanik immikkoortoortitsisoqarpoq.
Tamatuma saniatigut kommunimi qamutit motoorillit taarsersornissaannut aningaasanik immikkoortitsisoqarpoq, matumani utoqqarnut bussinik nutarterineq umiatsianillu kivittaatip ikkunneqarnissaa ilaapput.
Kommune Kujallermi kommunimut akilereraarut aamma appartinneqarpoq. Tassanilu akileraarut 44 procentimit 43 procentimut appartinneqarluni.