Auken: Uran sakkussiarsuarnut atussavaat

Aatsitassanik uraanitalinnik piiaasoqanngilluinnarnissaanik oqallinnermut tunngasunik, Danmarkimi atuagassiaq "Ingeniøren" pingaarnerutitaminik allaaserisaqarpoq. SF-imeersup Margrethe Aukenip Nunatsinni uraanimik piiaasoqartariaqannginneranik isummernera atuagassiap allaaserisaani aallaavigineqarpoq. Aukenip isummernermini oqaatigaa, uran ullutsinni atomip nukingaanik nukissiornermut atorneqarani sakkussiornermut atorneqarusunnerussasoq.

Allattoq Hagen Højer Christensen, Elisa Isaksen

februaarip 02-at 2013 14:45

Margrethe Auken taama oqaaseqarnermigut, tassa isumannaatsuunissamut politikkimik tunngavilersorluni uraanimik Kalallit Nunaanniittumik piiaasoqarsinnaanera pinngitsoortinniaramiuk, nunasiaatilittut pissusilersortoq, allaaserisami pingaarnermi oqaatigineqarpoq.

Allaaserisami ilanngullugu oqaatigineqarpoq, kalaallit nunaminni isumalluutinut nunamiittunut oqartussaammata, isumannaallisaanermullu apeqqutit pineqartillugit qallunaat oqartussaaffimmik tigumiaqarmata.

Atuagassiap Ingeniørip pingaarnertut allaaserinnittuata, Kalaallit Nunaat uraanimik qalluisinnaanerminik akornuserneqassappat tamanna pisuusaarnerussasoq oqaatigaa, tamannami pingaarutilimmik aningaasatigut isaatitsissutaalersinnaammat.

Tassami saffiugassanik qaqutigoortunik piiaasoqassappat, qallorneqartut tamarmik uraanitaqartussapput, taava tamanna qallunaat politikeriisa qanoq piniarpaat? Qalluereerunik uraani nunamut matooruteqqinniarpaat?

- Suut tamaasa eqqarsaatigalugit saffiugassat qaqutigoortut piiarnerini uraani ilaatinneqanngippat piiaaneq imminut akilersinnaanavianngilaq, atuagassiaq Ingeniøren pingaarnerutitatut allaaserisamini allappoq.

Allaaserisami maluginiarneqartussatut aamma oqaatigineqarpoq, nakkutilliisussanik pilersitsisoqaraluarpat, uraanimik piiaanermi niuernermilu nunani tamalaani malittarisassanik pilersitsisoqarsinnaasoq. Aamma kalaallit qallunaallu suleqatigiinnermikkut, Afrikami naalagaaffiit aningaasarsiutigilluagaannik aningaasarsiorlualersinnaassagaluarnersut Ingeniørimi pingaarnertut allaaserinnittup ilanngullugu apeqqutigaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.