Atuarfik Inussuk: Atuarfiup pisortaa ilungersunartorsiortoqarsimagaluartoq ernumassuteqanngilaq
Nuummi Atuarfik Inussuup ajornartorsioqattaarneri 2024-mili qitiusumik saqqummiunneqartarput.
Ikuallattoornissamut isumannaallisaaneq ajorsimavoq imermillu qatserinermut atortunik ikkussuisoqartariaqarsimalluni.
Saniatigut, atuarfiup toqqavia issimit qaffakkiartorsimavoq, igalaavi ussiissimapput, kiffiutai millullutik iigaalu sannarlutaallutik.
Sermitsiap sanaartornermi aningaasartuut katillugit 633.739.112 koruuniusut siorna septembarimi allaaseraa.
Kommuneqarfik Sermersuup Istak aamma Kommuneqarfik Sermersooq isumaqatigiissuteqartut ukioq manna siusinnerusukkut aamma isumaqatigiissuteqarfigaa.
Oqaluttuassalli nuannerpallaanngitsut atuarnerup ulluani siullermi sammineqanngillat.
KNR-ip atuarfiup pisortaa, Dorthe Bidstrup nuannaarlunilu pissangasoq naapippaa.
- Pissanganaqaaq, qilanaarnarnikuunermik. Kiisami ullumi tassa atuarfipput atuartunut ammarpoq. Aallartippoq atuarneq.
Ilinniartitsisussaaleqineq ernumassutiginngikkaa
Atuarfimmi atuartut 964-iupput, ilinniartitsisullu 83-it klassinut 47-nut agguataarsimallutik.
IMAK-ip siulittaasuata, Elna Thomsen Heilmannip politikerit sakkortuumik siusinnerusukkut isornartorsiorpai.
Tamanna ilinniartitsisussaaleqinermik pissuteqarneruvoq, ilinniartitsisutummi naammassisartut ukiumut 20-upput, ilinniartitsisullu 140-t ukiuni aggersuni soraarninngortussaallutik.
Dorthe Bidstrupip Atuarfik Inussummi ingerlaavartumik ilinniartitsisussarsiorlutik aamma oqaatigaa.
- Ernumassuteqanngilanga. Pissanganartuaannarpoq, ilinniartitsisut aamma nikerartuaannarput. Kisianni ilinniartitsisussarsiortarpugut ataavartumik, ingerlaavartumik taamaasilluta aamma sapinngisamik atuartuutitta ilinniartitsisoqarnissaat qulakkeerniarlutigu.
Periarfissat nutaat
Nuummi illoqarfiup qeqqani atuarfiit marluk, tassa Atuarfik Ukaliusaq (USK) aamma Atuarfik Samuel Kleinschmidt (ASK) oqoqartut siorna paasineqarput.
Atuartut illoqarfimmi sumiiffinni assigiinngitsuni atuartinneqarnerannik klassillu agguataarneqarnerannik ilaatigut kinguneqarpoq, atuartut taamaalillutik piffissani assigiinngitsuni atuartortarlutik.
Atuarfiup nutaap atulerneratigut atuartitsinissamut teknologiinik ininillu nutaanik aamma periarfissaqarnerulerpoq.
Atuarfiup pisortaata tamanna atuartunut ilinniartitsisunullumi nuannaarutaanissaa neriuutigaa.
- Neriuppunga aamma kissaatigivara atuartut atuarnerminni, ilinniartitsisut sulinerminni atugassarititaat amerlasuut atuarfitsinniittut atorluarlugit aamma sulineq atuarneq ingerlalluarumaartoq.
KNR-ip borgmesteri, Avaaraq Olsen (IA) naapippaa, taassuma atuarfiup ammarnera aamma nuannaarutigaa.
