Issi, isugutak sannarlunnerlu Atuarfik Inussummi ajornartorsiutaasut
Nuummi atuarfik nutaaq, Atuarfik Inussuk, 2024-mi aasaanerani atuanngiffeqareernerup kingorna atuartuniit ilinniartitsisuniillu iserterfigineqarnissaminut piareeqqasussaanikuugaluarpoq.
Atuarfilli suli atuutsilerneqarnikuunngilaq, sanaartornermullu tunngatillugu imaqarniliat KNR-ip takunniffigisinnaasaasa ajornartorsiutit annertuut takutippaat:
Toqqavik nunap qerisarneranit qummut nikeriarsimasoq, igalaat ussiitsut iikkallu ikkussuunnerini kukkunerit.
Atuarfiup illutaasa toqqavii nunap qerisarneranit qummut nikeriarsimanerat april 2022-mili paasineqarpoq. Sanaartorneq pillugu ataatsimiinnerniit imaqarniliat naapertorlugit, toqqaviup teqeqqui 5 centimiiterit tungaannut qaffasinnerulersimapput.
Allaat boltit, toqqavimmik aalajangeeqqasussat, issinneraniit siggissimasut, nalunaarsuinermi nalunaarusiamiit 2022-meersumiit takuneqarsinnaavoq.
Kingorna aaqqiissutissanik assigiinngitsunik ujartuisoqarsimavoq.
Iikkat ussiitsut oqorsaallu masattoq
Atuarfissallu illutai arlallit ussiinnerat sanaartorneq pillugu ataatsimiinnerniit imaqarniliani 2022-meersunit uppernarsarneqarpoq.
Igalaakkut betonimilu katiffiit akornisigut erngup isaasarsimaneratigut oqorsaat masatsertarsimasoq misissuinerit takutippaat.
Ajornartorsiutit aaqqiivigineqanngippata sanaartortutut tunniussisussat qularnaveeqqusiissutaata atorunnaarsinnaanissaa sanaartortitsisumiit ernummatigineqarsimavoq.
Tamanna ilutigalugu iikkat gipsiusut ikkussuunneqarsimasut, isumaqatigiissummut naapertuutinngitsutut sanaartortitsisumiit uparuarneqarput. Isumaqatigiissut naapertorlugu, gipsi qisunnik krydsfinérpladenik tunuliaquteqartussaasimagaluarpoq, taamatulli suliarineqarsimanngimmat iikkat amerlanerit piiarneqartariaqalersinnaapput.
Oqaaseqarfigineqanngitsoq
Atuarfik Inussummut tunngasut Kommuneqarfik Sermersuumiit oqaaseqarfigineqarnissaat KNR-miit anguniarneqaraluarpoq.
Avataaniit misissuisussat attuumassuteqanngitsut kikkuussanersut misissuinerlu qaqugu piariissangatinneqarnersoq KNR-imiit paasiniarneqaraluarput.
Tamakku saniatigut kinguaatoorneq, Kommuneqarfik Sermersuumut aningaasartuutaareersut qaavatigut, qanoq suli aningaasartuutaatigissanersoq aamma akissutissarserusukkaluarpagut, kiisalu atuartut sulisullu qanoq sivisutigisumik atuarfittoqqaniiginnassanersut aamma akissutissarserusukkaluarlutigu. Siunissami sanaartugassanut tunngatillugu taamatut inissittoqaqqinnginnissaa pillugu kommunimiit qanoq qulakkeerinninniartoqassanersoq KNR-imiit aamma apeqqutigineqarpoq.
Attaveqaqatigiinnermut immikkoortortaqarfimmi pisortaq Rosannguaq Rossen KNR-imut mailerluni allappoq, attuumassuteqanngitsuniit misissuisisitsineq naammassitinnagu oqaaseqarallasinnaanatik.
- Misissuineq naammassippat pisortatigoortumik ilisimatitsissuteqarumaapugut, Rosannguaq Rossen KNR-imut mailerluni allappoq.
2022-mi qerisoornerup kingunerisaanik qaartornerit suullu aaqqiissutaassanersut paasiumallugit, Sanarfinermut Avatangiisinullu Ingerlatsivik KNR-imiit aamma attavigineqarpoq.
Ingerlatsivimmiit akissut unaavoq:
- Tassunga tunngatillugu paasissutissat nassiunneqartut ( takunniffigisinnaasaat aaqq.), Ingerlatsivimmiit massakkorpiaq tigummisatuaraagut.
Ukioq atuarfiusussaq nutaaq aallartippoq, atuarfittaassarlu 2025-p ingerlanerani atoqqaarfissiorneqassasoq Kommuneqarfik Sermersuumiit kingullermik nalunaarutigineqarpoq.
