Assammik arsarneq: Arnat nunanut allanut unammisartut apriilimi Frankrigiliassapput

Arnani nunanut allanut unammisartut sungiusaasuata Jakob Larsenip taktikimut allattarfini maanna misissoqattaarpaa eqqarsaatigalugulu arsartut qanoq piginnaasallit isumalluutigisinnaanerlugit.

Kalaallit Nunanut allanut unammisartut assersueriaasissaat saassusseriaasissaallu maanna pilersaarusiorpaa. Piffissaqangaanngilarlu unamminerit nalaanni arsarnermi allannguissutigisinnaasat inissinniarnissaannut.

- Marsimi sungiusaqatigiissaagut kiisalu apriilimi Parisiliartussaalluta. Aamma aningaasaliisoqarsinnaappat ukiamut sungiusarteqqikkusuppakka VM-imut anngunniukkiartigata ilimanarporlu unamminerit taakku Canadami decembarimi pissasut, Jakob Larsen KNR-imut oqarpoq.

Angisuut nukittuullu

Nuummi sungiusaqatigiinnermi arsartut 21-t peqataassapput. Poorskip kinguninngua Parisiliarnissami taakku 14-16-inut ikilisinneqassapput. Sungiusaqatigiinnerni siunnerfik tassaavoq VM-imut anngunniunnermi kalaallit unammisassaannut piareersimalluarnissaq.

- Amerikami akullermi avannarlermilu anngunniuttoqartillugu, nunani taakkunani assammik arsariaatsit Europami assammik arsariaatsinit allaanerusarput, Jakob Larsen nassuiaavoq.

- Amerlanertigut assersuisut sassasinnerusarput. Amerlanertigut saassussinermi arsartut ataasiakkaarlutik iliuuseqarniarnerusarput. Angisuut nukittuullu teknikikkut inorsaateqartut siumugassaasarput. Tamatuma kingunerisaanik assersuisinnaasussaavugut unammisatsinnut akornusersuisinnaaffiusussanik, Jakob Larsen oqarpoq.

Taanna oqaluttuarpoq paarlattaasutut sungiusaasutut oktobarimi Islandimeeqataanermini assersuinermi pitsaasunik arlalitsigut takusaqarluni.

Maanna arsartut ilaat angalanermi tassani peqataanngitsut naapittussanngorpai. Assersuinerinnaq tassani pineqartussaanngilaq. Aamma pingaartinneqartumik sammineqassaaq sapinngisamik arsartut amerlasuut ilisimassagaat arsariaatsit atorneqartussat ajoqusertoqarnerani imaluunniit allanik pissuteqartumik pisinnaajunnaartoqarnerani iligiit patajaannerussammata.

Savalimmiormiut nuannaartorai

- Uani aamma eqqarsaataavoq iligiit sakkortusaarniartut sassasinniartullu piaareersimaffigissagivut ilimagaaralu taama pineqarumaarluta. Taamaattumik saassussinermi arfineq marluulluni arfinilinnut unammineq arnat VM-eqarnerani takusara soqutiginaateqarpoq, Jakob Larsen oqarpoq.

- Arsariaaseq Savalimmiormiut atugaat nuannaartoreqaara. Sassasilluni assersuiniartutut tamanna atorsinnaagutsigu iluaqutigikuttuussavarput. Soorunami aamma saassussinermi arfiniliullutik arfinilinnut unammineq atortarumaarparput, Jakob Larsen oqarpoq.

- Eqqaamassavarpulli qanoq ittuunerput uani apeqqutaalluinnarmat. Periutsit atorniakkavut aqulluarsinnaagutsigit apeqqutaassanngilaq qanoq assersuiffigineqarnerput uagutsinnut iliuuseriniarneqartunut piareersimagatta, Jakob Larsen oqarpoq.

VM-imut anngunniuuttarnermi kalaallit Amerika akullermiut avannarlermiullu unammisarpaat taakkulu ilaat unamminerni nikingasarput inissinniunnernili naligiittoqangaatsiarsinnaalluni.

VM-ip naggataarneqarnerani Amerikap akullermiut avannarlermiullu inissaq ataaseq pigivaat 2023-milu kalaallit VM-eqataapput.