Aqqusinermi tarrisimanngitsumi pinngitsaaliilluni atornerluisoqarnerata kingorna: Innuttaasut suli toqqissisimasinnaapput
Niviarsiaraq 18-it inorlugit ukiulik Nuummi aqqusinermi tarrisimanngimanngitsumi sapaatip akunnerata naanerani ullukkut pinngitsaalineqarluni atornerlunneqarpoq.
Pinerluuteqartoq tigusarineqartoq, politiinspektørip tullersortaa Kathrine Sandgreenip oqaluttuarpoq innuttaasut illoqarfimmi angalanissaminnut aarleqqutissaqanngitsut.
- Naak tamanna sapaatip akunnerata naanerani pigaluartoq innuttaasut aqqusinermi toqqissisimallutik angallassinnaapput, Kathrine Sandgreen oqarpoq.
- Nakuuserneq aamma pinngitsaaliilluni atornerluineq assigisaalu pillugit kisitsisaatitsinni takusinnaavarput, pinerliisup pinerlineqartoq amerlanerpaani attavigisaraa
Pinerluuteqartoq pinerlineqartorlu attaveqatigiittarnersut Kathrine Sandgreenip sapaatip akunnerata naanerani pisumut misissuineq pissutigalugu oqaaseqarfigisinnaannginnerarpaa.
Toqqissisimasinnaaneq allanngunngitsoq
Pisoq inuit aqqusinermiinnerisa nalaanni ualikkut pimmat suliamut qanoq takussutissiiva?
- Pisimasoq pillugu maannakkut misissuisoqarmat oqaaseqarfigisinnaanngilara.
Kathrine Sandgreen erseqqissaavoq inuit aarleqqutissaqanngimmat toqqissisimasinnaasut, illoqarfimmilu toqqissillutik angalasinnasut, soorlu aamma illoqarfinni allani.
- Illoqarfiit allat oqaatigineqasappata, erseqqissaassutigiinnassavara taakkunani innuttaasut aamma aarleqqutissaqanngimmata, toqqissillutik angalasinnaallutik, Kathrine Sandgren oqarpoq.
Sapaatip akunnerata naanerani pinerluuteqartoq ippassaq sassartinneqarpoq, politiillu suliamik misissueqqissaarneranni ulluni 28-ni tigummigallarneqartussanngortinneqarluni.
