Angerlarsimaffeqanngitsut Nuup killeqarfiata avataanut nuussasut, sumummi nuussappat?
Nuummi Sipisaq Kangillermi toqqinik sisamanik inunnit arfineq-marlunnit najugarineqartunik maannakkorpiaq nappaqqasoqarpoq. Najugaqartut angerlarsimaffeqanngitsuupput kommunillu taakkua unioqqutitsillutik tupermi najugaqarnerarpai. Taamaattumik maanna nuussasut kommuni isumaqarpoq.
Angerlarsimaffeqanngitsut tupermik nappaasimasut ilagaat Thue Noahsen. Taanna tupermi ukiuni sisamani kingullermi najugaqarpoq.
- Tamanna eqqissisimanaqaaq, taanna KNR-imut oqarpoq.
Angerlarsimaffeqanngitsut allat Thue Noahsenip tupiata eqqaani toqqinik kingullertigut nappaapput.
Taakkua ilagaat Thue Olsen Heilmann aamma Gerda Mikaelsen.
Taakkua tuperminnik qaammatit marluk matuma siornata missaanni nappaapput.
Unioqqutitsinerusoq
Tamannali tamaanga killeqarpoq. Kommuneqarfik Sermersuummi toqqit piiarneqarnissaat angerlarsimaffeqanngitsullu illoqarfiup killeqarfiata avataanut nuunnissaat aalajangerpaa.
- Nammineerluta nuunngikkutta toqqit politiit ikiorsiullugit piiarneqassapput, angerlarsimaffeqanngitsut KNR-imut pingasunngornermi ullaap tungaani oqaluttuarput.
Taakkua oqartussaasut toqqit peerneqarnissaannik aalajangiisimanerat pakatsissutigaat.
- Oqarunik nuussasugut toqqillu piiassagivut sumut nuunnissarput oqaatigissavaat, kisianni oqartussaasut sumut nuunnissarput oqaatiginngilaat, Thue Noahsen oqarpoq.
-Nuunnissatsinnut piareersarnikuunngilagut illoqarfiup sortaanut nuussanerluta nalugatsigu, Thue Olsen Heilmann oqaluttuarpoq.
Thue Noahsenip kommunip aalajangigaa naammagittaalliutigaa, naammagittaalliutaalu Aningaasaqarnermut Akileraartarnermullu Naalakkersuisoqarfimmut ingerlatinneqarsimavoq, naalakkersuisoqarfiullu kommunip aalajangigaa attatiinnassallugu akissuteqaatimini takisuumi allappaa, toqqillu najugaqarfittut atorneqarmata peerneqassasut.
Pilersaarusiornermut inatsimmi aalajangersakkani nunaminertamik atuinermut inatsimmut unioqqutitsinerusoq naalakkersuisoqarfimmit allakkami allaqqavoq.
-Taamaalilluni pilersaarusiornermut inatsimmi § 37 naapertorlugu nunaminertamik atuinermut oqartussat (kommunip) akuersissutigisariaqarpaa. Naalakkersuisoqarfiup paasivaa, kommuni naammagittaalliuuteqartumut nunaminertamik atugassiinermik nunaminertamilluunniit akuersissuteqarnermik tunniussisimanngitsoq. Taamaattumik tupip inissisimanera inatsisinik unioqqutitsinermik taaneqarsinnaavoq, naalakkersuisoqarfik naammagittaalliuummut akissuteqarnermini taama allappoq.
Sumi najugaqassaagut?
Angerlarsimaffeqanngitsut KNR-imiit oqaloqatigineqartut najugaqarfimminniit illoqarfiup killinganit 500 meterinik ungasissusilimmut nuuttussanngornertik oqaatigaat.
- Mittarfiup tunuanut? Thue Noahsen aperivoq. Qinngorpumiissinnaanngilagut tuperfissaqanngimmat. Toqqit sumut inississinnaanerlugit eqqarsaatigiuminaappoq, Thue Noahsen oqarpoq.
- Ungasippallaaqaaq. Thue Olsen Heilmann oqarpoq.
- Qinngorpumut nuussinnaanissarput qularnarpoq ungasippallaaqimmat. Pingaartumik ulloq naallugu pisuttuulluni kisianni allatut ajornartumik manna eqqissisimanaraluaqisoq akuerisariaqarparput. Manna maqaasissuarput, Gerda Mikaelsen oqarpoq.
Ippassaq pingasunngornermi ualikkut nuuttussaagaluarput, Thue Noahsenilli allamut nuunnissamut peqqussut kommunip kinguartissimagaa pingasunngornermi ualikkut oqaatigaa, angerlarsimaffeqanngitsullu sumut nuunnissaat paasineqarpat aatsaat nuussinnaapput.
KNR-ip borgmesteri Avaaraq Olsen suliaq pillugu tallimanngorpat ullaap tungaani apersussavaa.
