USA-p præsidentip tullia J.D. Vance nunanut allanut tunngasunut ministeri Vivian Motzfeldt (S), danskit nunanut allanut tunngasunut ministeriat Lars Løkke Rasmussen aamma Amerikamiut nunanut allanut tunngasunut ministeriat Marco Rubio Washington D.C.-mi pingasunngorpat ataatsimeeqatigiilerpata peqataassaaq.

Lars Løkke Rasmussen Folketingimi nunanut allanut tunngasunut ataatsimiititaliamik ataatsimeeqateqareerluni taama oqarpoq. Kunngeqarfiup USA-mut attaveqarnera ataatsimiinnermi oqaluuserisassatuaavoq.

Lars Løkke nangilluni oqarpoq ataatsimiinneq Præsidentip Illorsuani pissasoq, J.D. Vancelu qaaqqusisuusoq.

- Oqaloqatigiinnerit, kingullermik ataatsimeeqatigeereerlutali suli ilungersunarsigaluttuinnartut, ataatsimiittarfimmi immitsinnut isigisinnaalluta piniassammata ataatsimeeqateqarumavugut, Lars Løkke Rasmussen oqarpoq.

Sakkutooqarnerulerneq

Danskit illersornissamut ministeriat Troels Lund Poulsen, Løkkep oqaaseqareernerata kingorna oqaaseqarpoq, taassumalu Natop generalsekretæria Bruxellesimi ataasinngornermi ataatsimeeqatiginiarlugu ilisimatitsissutigaa.

Ataatsimiinnissaq danskit naalakkersuisuinit piumasarineqarpoq.

- Natomi oqallinnissaq minnerunngitsumillu Natop Issittumi issittumilu avatangiisini peqataaneranut tunngatillugu soqutiginninnerulersitsinissaq danskit ukiuni arlalinni pingaarnerpaatippaat, oqarpoq.

Danskit sakkutuuisa Kalaallit Nunaanni siunissami amerlanerulernissaat ataavartumillu najugaqarnissaat, nunanit allaneersunik aamma peqateqarlutik, Illersornissamut ministerip ilanngullugu ilisimatitsissutigaa.

- Nunat allat Natomiittut Kalaallit Nunaanni sungiusaanermut 2025-mi peqataanerat takuarput, taamatuttaaq 2026-mi pisoqassaaq, Issittumi tamaanna ilungersunartutut isigineqarluni, sakkutooqarnerunissaq pisariaqartikkatsigu, Troels Lund Poulsen oqarpoq.

Issittumi ukiup ingerlanerani sungiusarnerusoqassaaq. Sakkutuut eqimattakkaat qassit Issittumiissanersut, Illersornissamut ministerip itisilinngilaa.

Pissutsit nakkutigineqartut

USA-p præsidentiata Donald Trumpip USA-p Kalaallit Nunaannik tiguaasariaqarnera arlaleriarluni oqaatigereeraalu Præsidentip Illorsuani  ataatsimeeqatigiinneq pivoq. Sakkutuulersorluni tiguaasoqarnissaa itigartitsissutiginngilaa.

Præsidentip Illorsua inuit attaveqaqatigiittarfiisigut assimik marlunngornerup unnuaani saqqummiussivoq, assimi angutit marluk, Donald Trumpimut J.D. Vancemullu assingusut,  Kalaallit Nunaata assinga igalaakkut isigigaat takuneqarsinnaavoq.

'Monitoring the situation' (Pissutsit nakkutigineqarput, aaqq.), assimut allagartaliunneqarpoq.

Naalakkersuisut danskillu naalakkersuisuisa Trumpip oqaasii itigarteqattaareerpaat.

Naalakkersuisut tusagassiuutinut nalunaarummi ataasinngornermi oqaatigaat, Kalaallit Nunaata illersorneqarnissaa pillugu nunat Natomut ilaasortaasut arfinillit oqaloqatigineqartut.

Frankrigi, Tysklandi, Italia, Poleni, Spania Tuluillu Nunaat ataatsimoorlutik sapaatip-akunnera kingullermi nalunaaruteqarput.