Amerikamiut eqqumiitsuliortut Trumpip nunatsinnik pileriginninnera pinnguaatinngorlugu quiassuaatigigaat
Trumpimik akerliusut ilisimaneqanngitsut, spilli Operation Epic Furious: Nuuk ‘Em All-imik taaguutilik, qarasaasiakkut Washington D.C.-mi aamma Nuummi sapaatip akunnerata siuliani pinnguaataasoq, spillerneqarsinnaasoq, ilusilersorpaat.
Eqqumiitsuliortut Washington D.C.-miittumi National Mallimi spillinik pingasunik sapaatip akunnerani uani ilisipput Nuummilu Qaqortumi (Myggedalen) ataatsimik ilisillutik.
Nuummiittorli peerneqarpoq. Eqqumiitsuliortulli ileqqinniarlugu sulissutigaat, eqqumiitsuliortut ilaat KNR-imut allappoq.
Quiassuaatitut suliniut USA-p præsidentiata Donald Trumpip nunatsinnik tiguaarusunneranik quiassuaatiginninneruvoq.
- Iranimut sorsunneq spilliliarereerlugu Kalaallit Nunaannut tunngasumik spilliliorpugut, spilliliortut, Secret Handshake-mik taaguutillit, allapput.
- Eqqarsarluta: Suna tullinnguuppa? Uuma angutip sorsunnermik ataasiinnarmik aallartitsinini naammagiunnanngilaa. Iligisamik, soorlu Kalaallit Nunaannik, sioorasaarinissamik naqisimanninnissamillu isumaqarnera tiguaanissamillu sioorasaarinera tupinnangaarmat, spilliliarerusussimavarput.
- Eqqumiitsunngortinniarsarisimavarput, quianartunngortillugu sioorasaarinerillu avataanit takullugit ingasattajaartut takutinniarsarisimallugit.
Spilli qanganisarpalaartoq marlunnik immikkoortortaqarpoq.
Takorluuinerujussuaq
Aallaqqaammut pingaarnertullu, Trump Iranimi sorsunnermit allamut saasarneqarpoq.
Spillimi præsidenti Floridami najugaqarfimminiippoq Mar-a-Lagomi, tassanilu siunnersortini Iranimiit qanoq qimaasinnaanerluni isumasiorpai.
Tungitsinnullu qiviarput.
Præsidenti nunatsinnukarpat nunarput præsidentip assingatut ilusilersorniarneqassaaq.
Napparsimmaviit qitittarfinngortinneqarput kuultinik qallikkat, illuaqqat aningaasanoortarfinngortinneqarput nuannaarnerlu pillugu ilisimatusarfik kryptoqarfinngortinneqarlutik.
Trump spillimi nunatsinniittoq aqunneqassaaq, tassanilu uumasorujussuit saamerliuniat, meeqqat akiuussutissalerneqarsimasut danskillu akiorneqassapput præsidentilu sinitsinnaveersaarneqassalluni.
Donald Trump naggataatigut uuliamik ikuallatsitsingaarmat sermersuaq aassaaq, nunarpullu takorluugaatut ilissalluni, tassa golfertarfinngussalluni.
‘Kisianni, tamannalu pingaaruteqarpoq, spillimi suna tamaat naammassigaanni, præsidenti illorsuaminiilluni itissaaq, Kalaallillu Nunaanniinneq takorluuinnagaasoq paasineqassalluni. Iranimilu ajornartorsiutinik piviusunik suli aaqqitassaqarluni paasissavaa’, eqqumiitsuliortut ilisimaneqanngitsut KNR-imut tamanna erseqqissaatigaat.
Taassumalu kingorna, spilli Iranimut tunngatillugu spillimut uteqqissaaq aallaqqaataaneeqattaarlunilu. Tassa imaappoq, spilli ajugaaffigineqarsinnaanngilaq, eqqumiitsuliortut allapput.
Eqqumiitsuliortut oqarnerattut tusagassiuutillu The Washington Postip tusagassiinerattut, Amerikami illoqarfiit pingaarnersaanni nuannarineqarpoq.
- Inuit quianartortaa, eqqumiitsortai silarsuarlu killilersugaanngitsoq nuannaraat. Naatsorsuutiginngisanik saniatigullu naammassisassanik ulikkaarpoq, soorlu ilaatigut Trumpip siunnersortaasa ilaat Natalie Harp Trumpimut silaqannginnera illorsuanilu allagaaqqanik atuagassiisarsimanera pillugu allaaserisaq quiasaarutigaarput. Taamaattumik Natalie Trumpimut Kalaallit Nunaat tamakkerlugu allagaaqqanik aamma allatsittajaarparput.
‘Asanninnermik ataqqinninnermillu sanaaq’
Spilliliortut nunatsinnut oqariartuuteqarput.
Nunatsinnut sioorasaarineq innuttaasunulluunniit ernumatitsisimanera soqutaanngitsutut piniarsarinngilaat.
- Kalaallit Nunaanni innuttaasut paasissavaat, spilli asanninnermik ataqqinninnermillu sanaajummat taamaammallu taamatut tiguneqarnissaa neriuutigaarput. Uatsinnut quiasaarutigerusuppugut siuttuusullu iligisamik tiguaanissamut sioorasaarinerata eqqumiitsortaanik erseqqissaarusulluta.
- Amerikamiut politikkikkut iliuutsit aalajangersimasut quiassuaatigissallugit ileqqoraat taamaattumik uuma spillip taamatut ileqqoqarnitsinnut annikitsunnguamik ilanngussinnaanissaa neriuutigaarput.
Trumpimut qinngasaarisarnini tusaamaneqaatigigaa
Secret Handshake Washington D.C-mi Trumpimik isornartorsiuerpalaartunik sulianik ingasattajaartunik, ilaatigut Donald Trump kinguaassiuutitigullu atornerluisartup toqoreersup Jeffrey Epstein ilaarlugit inuusaliareriarlugit Best Friends Forever-imik qulequtsiilluni siornatigut suliaqarpoq.
Taakkua qarasaasiakkut pinnguaatiliartik siulleq, Operation Epic Furious: Strait to Hell, USA-p Iranimut sorsunneranik Trumpillu naalakkersuisuisa sakkutooqarnikkut attaveqaqatigiinnerminni qarasaasiakkut pinnguaatinut assingusunik atuisarnerannik illuaruaatiginnittoq, maajimi saqqummiuppaat.
Nuuk ’Em All eqimattamit oqaatigineqartoq naapertorlugu, Washingtonimi akeqanngitsumik ‘ulluni arlalinni’ pinnguaatigineqarsinnaavoq. Pinnguaat qarasaasiakkut internetimut attavilerluni tamanna pinerani pinnguaatigineqarsinnaavoq, eqimattap pinnguaatip maskiinap Nuummukaanneqaqqinnissaanik pilersaarusiornerani.
