Pakistanip Nobelip eqqissinermut nersornaasiuttagaanut Trumpi innersuukkusukkaa

Pakistani USA-p præsidentia Donald Trumpi Nobelip eqqissinermut nersornaasiuttagaanut innersuunniarlugu pilersaarpoq.

Taama inoqatinut attaveqaqatigiittarfimmi X-imi Pakistanip naalakkersuisui oqaaseqaamminni allapput.

Nobelip eqqissinermut nersornaasiuttagaanut naalakkersuisut innersuussisinnaapput. Pakistanip naalakkersuisuisa siunnersuumminnut, Donald Trumpi Pakistanip Indiallu akornanni maajimi akerleriinnerini, ullut sisamat qaangiunnerisa kingorna eqqisseqatigiinnissamik isumaqatigiissusiornera pillugu innersuussipput.

- Pakistanip neriuutigiuarsinnarpaa pimoorussilluni misiliinera nunap ilaanut nunarsuarmullu tamarmut patajaannermik suli taperseeqataajumaartoq, pingaartumik Kangiani Qiterlermi ajornartoornerit maanna pisut ataqatigiisillugit, allaqqavoq.

Oqaaseqaat naapertorlugu Pakistanip Trumpi eqqisseqatigiilersitserusuttutut “pimoorussisutut” isigaa.

Eqqisseqatigiinnissamik isumaqatigiissut

Indiamik akerleriittoqarneranut USA-p akuliunnera aaqqiissuteqaqataassasoq, Pakistan isumaqarpoq, massa illuatungeriit taakku akorniminni aaqqiissuteqarfigereeraat India isumaqartoq, nutaarsiassaqartitsivik Reuters allappoq.

Reuters naapertorlugu Trumpi isumaqatigiissummut naammattumik nersorneqarsimannginnini kinguneratigut naammagittaalliuutigisimavaa.

Inoqatinut attaveqaqatigiittarfiutimini Truth Socialimi allatami amerikap præsidentiata tallimanngormat nalunaarutigaa, Den Demokratiske Republik Congo aamma Rwanda Washington D.C.-mi eqqisseqatigiinnissamut isumaqatigiissummut atsiussallutik ataasinngornermi piareersimapput.

Tassani Donald Trumpip “qanorluunniit ilioraluaruma” imminut tunniunneqarnavianngitsoq allappoq.

- Kisianni inuiaat nalunngilaat tamannalu uannut tamanit isumaqarnerpaavoq, taanna allappoq.

/ritzau/