Danmarki Kalaallit Nunaanni mittarfinnik sanaartornermi millioninik arlalinnik aningaasaliisoq
Qallunaat naalagaaffiat Kalaallit Nunaanni Ilulissani nunanit tamalaanit mittarfiliornissamut aningaasaliissutaareersut saniatigut aningaasaleeqqippoq.
Allakkat juulip aappaata tungaanut isertuunneqarsimasut tunngavigalugit Jyllands-Posten allappoq.
Allakkiami allassimavoq “aningaasaliinissamut pisariaqartitsineq pilertortuusoq”, naliliinerup takutimmagu mittarfiliortitsisoq Greenland Airports International aningaasatigut taarsigassarsisinnaajunnaartoq.
Tamanna pivoq “ingerlatseqatigiiffiup niuernermut pilersaarutaani kukkusumik tunngavilersuuteqarneq arlallit” paasimmagit, tamatumalu kingunerisaanik Greenland Airports Internationalip nalinga ilimagisamit appasinnerusumik nalilerneqarmat.
Allakkat juunip 18-ianni allassimasut suliffeqarfiup aningaasaqarnikkut soqutigisai pissutigalugit isertuunneqarput.
400 millionit koruuninik ilaqqillugit
Kalaallit Nunaanni mittarfiliornissamut immikkut aningaasaliisoqassasoq, Aningaasaqarnermut ministeri Nicolai Wammen (S) Folketingimi Aningaasaqarnermut Ataatsimiititaliamut qinnuteqartuusimavoq.
Sanaartornermut tapiissutit katillugit 400 millionit koruuniupput, taarsigassarsiassartaasullu 1140 millionit koruunit angullugit amerlassuseqarput.
2025-mut aningaasanut inatsimmi sipaarniutigineqartussat 400 millionit koruuniupput.
Mittarfiliornissamut nutaamik taarsigassarsisoqarsinnaanissaq periarfissaanngitsoq allagartami uppernarsaammi allaqqavoq. Taarsigassarsiallu tamakkerluigt 2052-imi taarserneqareersimassapput.
Jyllands-Posten naapertorlugu, Nicolai Wammen siornatigut Kalaallit Nunaanni mittarfiit marluk, Nuummi Ilulissanilu, sanaartornissaannut aningaasanik pissarsisimavoq.
2022-mi taarsigassarsiat 450 millionit koruuniusut 600 millionit koruuninut qaffanneqarput, sanaartornerit ilimagisamit akisunerusut ersermat.
Qallunaat naalagaaffiat mittarfiit taakku marluk sanaartornissaannut 1600 millionit koruuninik aningaasaliissuteqareerpoq.
Nuummi mittarfik nunanit tamalaanit tikinneqarsinnaasoq novembarimi 2024-mi naammassineqarpoq, Ilulissanilu mittarfik 2026-mi naammassineqarnissaa naatsorsuutigineqarpoq.
Qallunaat naalagaaffiat Greenland Airports Internationalip 33,3 procentianik piginneqataavoq, sinnerilu Namminersorlutik Oqartussanit pigineqarput.
