Illersornissamut isumaqatigiissut nutaaq, Issittoq pillugu isumaqatigiissut 2 sapaatip akunnerata siuliani tallimanngornermi saqqummiunneqareermat isornartorsiuisut ikinngillat. Danskit illersornissamut ministeriata, Troels Lund Poulsenip aamma nunanut allanut naalakkersuisup, Vivian Motzfeldtip (S) qanimut sivisuumillu isumaqatigiinniareerneratigut isumaqatigiissuteqartoqarpoq.

Inatsisartuni ilaasortat arlallit isumaqatigiinniarnerit sioqqullugit naammattumik peqataatinneqarsimannginnertik isornartorsiorpaat. Pipaluk Lyngep (IA), Pipaluk Olsenip (D) Aki-Matilda Høegh-Damip (N) aamma Aleqa Hammondip (S) KNR-imit allakaatitassiamut Oqalliffimmut tallimanngormat pulaartut oqarnerat naapertorlugu Vivian Motzfeldtip Inatsisartut peqataatinnerusimassagaluarpai.

Nunatsinni borgmesterit marluk, tassa Kommuneqarfik Sermersuumit Avaaraq Olsen (IA) aamma Qeqqata Kommunianit Malik Berthelsen (S) aamma taama isornartorsiuipput.

Folketingimulli ukiuni qulini ilaasortaq, Aaja Chemnitz (IA) aperigaanni taassuma nalunaarutaa allaaneruvoq.

- Soqutigisagut arlallit ilanngunneqarput, peqataatitsinerlu siusinnerusukkut nalaassimasannit pitsaanerusutut isigaara, taanna oqarpoq.

Imaatigut kabeli piffissaq kingulleq ilanngunneqartoq

Aaja Chemnitzip imaatigut kabelimut nutaamut 3 milliardit koruunit isumaqatigiissummi ilaanera immikkut nuannaarutigaa.

Nunatsinni piffissami matumani imaatigut kabelit marluupput. Taakku arlaat kittorarneqarmat nunatsinni qaammatini arfinilinnit qulingiluanut interneteqartoqarnavianngilaq. Taamaammat taassuma imaatigut kabelimik pioreersunut marlunnut iluaqutaasinnaasumik pilersitsisoqarnissaa ukiuni arlalinni ilungersuutigaa.

- Isumaqatigiissummut ilanngunneqarnissaa uannut pingaaruteqarluinnarpoq, piffissarlu kingullerpaaq ilanngunneqarluni, taanna oqarpoq.

Aaja Chemnitz, isumaqatigiinniarnernut peqataatitsineq siusinnerusumit pitsaanerusoq oqaatigivat. Qanoq peqataatinneqartigivit?

- Ministeri (Lund Poulsen aaqq.) pisortatigoortumik ataatsimeeqatiginikuuara, taamalu ministeri illersornissarlu pillugu oqaaseqartartut pisortatigoortuunngitsumik oqaluuserinneqatigisimallugit. Imaatigut kabelip iluatsinnissaata tungaanut suliaqarnissara pingaartittorujussuuara. Isumaqatigiissummi matumani kabelip inuiaqatigiinnut iluaqutaasussaanera pingaarnerpaavoq.

Periarfissaq annaaneqarsinnaasoq

IA-meersulli Inatsisartuni ilaasortat arlallit borgmesterillu isumaqatigiinniarnermut siunersiorneqarsimanngitsutut misigisimanerat uggoraa.

Aaja Chemnitz nangippoq:

- Kalaallit Nunaata tungaaniit Danmarkimut isumaqatigiinniarluannginnissarput aamma ernumassutigaara, taamaaliorutta Kalaallit Nunaannut periarfissaq aamma annaasinnaavarput. Taamaammat isumaqatigiinniarnerni suliaqarluarnissara uanga pingaartingaatsiarsimavara – aamma pisortatigoortuunngitsumik isumaqatigiinniarnerni.

Parteeqatit, Avaaraq Olsen Nuummut tunngatillugu suliniutinut ilaannut ilaatigut Nuup Umiarsualiviani sakkutuut talittarfissaannik isornartorsiuivoq. Illersornissaqarfiup illoqarfiit pingaarnersaanni atortussaqarnerulernissaa qanoq isumaqarfigaajuk?

- Issittumi Sakkutooqarfik piffissamut naleqquttuni inissisimarusunnera paasisinnaalluarlugulu taperserpara.

- Umiarsualivimmut tunngatillugu Illersornissaqarfimmut soorunami periarfissaalernissaa eqqarsaatigaara, taakkumi akiliuteqartussaapput, kisianni Illersornissaqarfiup umiarsuinit aamma amerikamiut umiarsuinit talittarfik atorneqanngikkaangat allanit aamma atorneqarsinnaalluarpoq. Taamaammat pilersinneqartussaanngikkaluartumik peqalernissaa immikkut periarfissiinerussaaq.

- Kisianni innuttaasunut paasissutissiisoqarnerunissaa amigaatigaara, inuit taamaalillutik suut aalajangerneqarsimanersut taakkulu uatsinnut qanoq kinguneqassanersut paasisinnaassammatigit, Aaja Chemnitz oqarpoq.

Vivian Motzfeldtip KNR-imit sapaatip akunnerani siusinnerusukkut apersorneqarnermini isumannaallisaanermut tunngasut paasissutissallu mianersuutassat pissutigalugit isumaqatigiinniarnerit ingerlaneranni suliniutit nutaat pillugit qanoq amerlatigisut oqaloqatigineqarsinnaanerat killeqartoq nassuiaatigaa.

- Sakkortusisamik nipangiussisimasussaatitaanerup aqqani ataatsimiititaliaq susassaqartoq, taavalu partiit Inatsisartuni qinigaatitaqartut siuttui kisiisa avitseqatigisinnaasimavagut, Vivian Motzfeldt malittarisassaminnik nassuiaalluni oqarpoq.

- Taakkua paasissutissat suliaritinnikuusagut ilai illersornissamut tunngassuteqarmata allaat ima isertugaatigisumik inissisimasarput, ininut immikkut ittumik sillimmasersukkanut aatsaat iseqqaarluni atuarneqarsinnaallutik, taanna oqarpoq.