Upernavik Seafood: Qalerallit suliareqqitassanngorlugit nassiunneqartarallassapput

-Sulisussarsisinnaatinnata taamaaliorsinnaanngilagut, suliffissarsiuussisarfimmeeqqammerpugut arfineq-pingasunillu sulisussarsioratta sisamaannaat pissarsiaraagut. Upernavik Seafoodimi pisortaq Flemming Andersen tunngavilersuivoq.

Upernavik: Qalerallit suliffissanik pilersitsillik!

Aamma nassuiaavoq qalerallit suliareqqaarneqartalissagaluarpata qanga ajornartorsiutaasimasut uteqqerataannaasut, tassalu sulisussaarunnermi pitsaanerpaanik tunisassiorsinnaajunnaarneq aalisakkanillu eqqaasariaqalertarneq. Ajornartorsiutit tamakku peqqutaallutik avammut nassiussuineq kisimi atorneqalerpoq.

Qaasuitsup Kommuuniata naatsorsuutai naapertorlugit qaleralittassiissutit 8000 tonsit ilaat 6000 tonsit nammineq suliareqqinneqartartuugaluarpata Upernavimmi suliffissanik ataavartunik 78-inik pilersitsisoqarsinnaagaluarpoq.

-Qaleralinnik imaluunnit aalisakkanik naleqarnerulersitsinissaq anguniarneqassasoq kissaatigaarput, tassani eqqarsaatigineqarpoq qalerallit imaluunnit aalisakkap avammut tunineqarnerani inereerlugu pisisartumut pisiariuminarninngorlugu anninneqartalernissaa. Taamaalilluni aalisartumut nunatsinnilu aningaasaq annertunerpaaq pissarsissutaalersinnaaniassammat. Qaasuitsup Kommuuniani borgmesteri Ole Dorph ataatsimeersuarnermut atatillugu apersorneqarnermini ilaatigut taama oqarpoq.

Qaasuitsup Kommuuniatali kissaataa Upernavik Seafoodimit ilalernartinneqanngilaq.

-Sulisussat ullut tamaasa suliartortartuuppata sulisussat 100-t kisiisa atorfissaqartissagaluarpavut, ukiulli ataatsip ingerlanerinnaani sivikitsumik sivisunerusumilluunnit inuit 400-t taarseraallutik sulipput. Aasaanerani sulisussaaleqinerpaasarpugut, Flemming Andersen erseqqissaavoq.