Upernavik: Qalerallit suliffissanik pilersitsillik!
Tamanna Qaasuitsup Kommuniata Upernaviup nunaqarfiini qulingiluani inuussutissarsiutit siuarsarneqarnissaat pillugu ulluni pingasuni ataatsimeersuartitsereernerani peqataasut anguniagassatut ullumi ullup qeqqalernerani aalajangiuppaat.
Kommuunimmi naatsorsorsimasai najoqqutaralugit Upernavimmi nunaqarfiinilu qaleralinnit 8000 tonsinit ukioq-mannamut pisassiissutigineqartunit 6000 tonsit Upernavimmi suliarineqarlutik tisaneqartaleraluarpata, Upernavimmi tamanna suliffissanik 78-nik pilersitsiviusinnaangaluarpoq:
- Tassa qaleralinnik imaluunniit aalisakkanik naleqarnerulersitsinissaq kissaatigaarput anguniarneqassasoq suliniutigineqassasorlu annertuumik. Tassa tassani eqqarsaatigineqarpoq qalerallip imaluunniit aalisakkap avammut tunineqarnerani inereernerullugu, pisisartumut pisiariuminarninngorlugu, anninneqartalernissaa. Taamaalilluni aalisartumut Nunatsinnullu aningaasaq annertunerpaaq pissarsissutaalersinnaaniassammat, borgmester Ole Dorph oqarpoq.
Kisitsisit takutippaat Upernaviup nunaqarfiini suliffissaaleqisut aapriilimi 181-iusimasut, illoqarfimmi suliffissaaleqisut 100-jusimasut. Tamannalu ataatsimeersuarnermi peqatasut allanngortikkusuppaat:
- Taakkua suleqatigiilluta, maani susassaqartut assigiinngitsut, kommuuni, Namminersorlutik Oqartussat aamma taassuma ataani selskabit assigiinngitsut suleqatigiillutik assigiinngitsunik suliniuteqassasut inerisaaqqinnissarput naammaginartumik angussagutsigu. Tassaavorlu taanna isumaqatigiissutigineqartoq. Tassaavorlu taanna ukiuni tulliuttuni, immaqa oqarsinnaavugut, biibilissarput, Ole Dorph,ataatsimeersuaqataasunit tapersersorneqartoq, oqarpoq:
- Sumiluunniit, soorlu sinerissami allani, aalisartut periarfissaqartitaanerat eqqaassagaanni soorunami tunitsivitsigut aamma Upernaviup eqqaani pitsanngorsaasoqarnissaa uagut kissaatiginerpaavarput. Aamma nunaqarfinni. Aamma tunitsiviit ilaatigut uninngatinneqartut aallarteqqinnissaat soorunami inussiarnersumik kissaatigineqarpoq, Kangersuatsiarmiu, Aron Kristiansen, oqarpoq.
Ataatsimeersuaqatigiittut ukiup affaa qaangiuppat naapeqqissapput:
- Isumaqatigiippugut una anguniagassatut siunnersuusiarput akuersissutigineqartorlu aallaavigalugu ukiup affaa qaangiuppat naapeqqinniarluta. Takuniarlugu suliniutitut siunniussagut sumut killissimanersut, Ole Dorph oqarpoq.
Aqutsiveqarfik Upernavimmi ukioq-mannamut qaleralittassat 8000 tonsiusut aalisartumut tunineqarnerminni 95,2 million koruuninik naleqartussatut tagginneqarput.
