Tasiilami nakorsap internettip attavilunnera isornartorsioraa

Tasiilap napparsimmaviani internettip Starlink pissutigalugu sukkangaatsiarneratulli sukkatigisumik attavik atuukkunnaarpoq.

Attavimmut antenne Inu:it-mik ikkussaammat inatsisinik unioqqutitsinnginnersoq qularutigineqalermat atorunnaarsinneqarpoq. Nalunaarasuartaateqarnermut aqutsisut it-lerinermik suliffeqarfik kisermaassisussaatitaanermik unioqqutitsisut politiinut unnerluutiginninnerannik tamanna kinguneqarpoq.

Tasiilami napparsimmaviup attavia taamaammat Tusassiminngaanneersunngoqqippoq. Tamannalu pissutigalugu Tasiilami nunap immikkoortuani nakorsaaneq, Hans Christian Florian allagaqarpoq.

- Tusassimit attavimmut uteqqippugut, tamanna ajornermiit ajorneruvoq. Internettimut attaviup ajungaatsiarnera pissutigalugu piffissarujussuaq asuleertarparput, tamannalu pitsaanerusinnaasoq ilisimallutigut soorunami puullaaqinarpoq, taanna KNR-imut mailikkut allappoq.

Tasiilap napparsimmavianut Starlinkikkut ukioq manna siusinnerusukkut attaviliisoqarpoq, attavillu sukkasooq sivikitsuinnarmik nuannaarutigineqarpoq. Ikkunneqarneraniimmi ullut marluk qaangiutiinnartut peerneqaqqippoq.

Nunap immikkoortuani nakorsaanerup Nalunaarasuartaateqarnermut aqutsisut qarasaasialerinermik suliffeqarfimmik politiinut unnerluutiginninnera ‘tissinaannartuusoraa. Taassumami Tusassip Nalunaarasuartaateqarnermut aqutsisunit kisermaassisinnaatitaasup Inu:it aaqqiissutissaqarnera akuerisariaqaraa isumaqarpoq.

- Inu:it-mut ajoqusiiniarunnaarlusi, taanna allappoq.

Oqalunneq isumaqanngitsoq

Hans Christian Florianilli Tusassip kisermaassisussaatitaanerminik illersuiniarnera paasisinnaalluarlugu allappaa. Suliffeqarfik nunaqarfinnut avinngarusimasuniittunut pilersuisussaatitaavoq, tamannalu ‘akisuvoq’.

Tamatumali saniatigut suliffeqarfik 2022-mi 140 millioninik aamma sinneqartooruteqarpoq, taamaammat attaviluttumik akisuumillu internetteqaraanni tamanna ‘eqqarsarnartoqartoq’, Hans Christian Florian isumaqarpoq.

- Sinneqartoorut uagutsinnut attaviluttumik akisungaatsiartumillu internetteqartunut iluaqutaanavianngilaq, taanna allappoq.

- Tusassip Tasiilami sukkanerusumik akikinnerusumillu internetteqalernissaa arlaleriarluni neriorsuutigaa, naammaginalinngisaannarporli, taanna allappoq.

Tusassip Inu:it-llu niuerfimmik avitsinnginnerat Hans Christian Florianip paasisinnaanngilaa.

- Tusassimut Inu:it-mullu iluaqutaasumik avitsisinnaanissarsi misissortariaqarparsi, kisianni atuisartunut pingaarnerpaamik, taanna naggasiivoq.

KNR-ip Tusass oqaaseqartinniarsaraa.