Suliffissaaleqisut suleqqilernissaannut Naalakkersuisut siunnerfeqartumik suliniuteqarnertik ukkataraat

Naalakkersuisullumi aningaasaqarnikkut ingerlatsineq pillugu 2014-imut nalunaarusiaanni, Aningaasanut Naalakkersuisup Vittus Qujaukitsup saqqummiussaani, suliffissarsiortorpassuit suliffissanillu pilersitsiniarluni suliniutit sammineqangaatsiarput.
 
- Ukiut kingulliit ingerlanerini suliffissaaleqisut amerliartorput, inuuniarnikkullu ajornartorsiutit annertuut immikkut ittumik iliuuseqarfigineqartariaqarlutik. Taakku saniatigut innuttaasut katitigaanermikkut nikerarnerisa nassataannik pisortat aningaasaqarnerat aaqqissugaasumik amigartoorfiussaaq, Vittus Qujaukitsoq allappoq, nangillunilu:

- Unammilligassat iluarsiiffiginiarlugit aningaasaqarnerlu pitsaanerulersinniarlugu suliaqareeqaagut. suliffissaaleqineq akiorniarlugu piffissaq qaninneq eqqarsaatigalugu immikkut ittumik suliniuteqarluta aallartippugut, taanna allappoq.
 
Ilaatigut sanaartornermi iluarsartuussinermilu suliassat 175 millionit koruuninik nalillit suliarineqarnissaat, Naalakkersuisunit qanittukkut siuartinneqarput.

Aamma atuaruk: Ukiup ataatsip ingerlanerani suliffissaaleqisut 439-nik amerleriarput

- Soorunami taakku kisimik suliarineqarnissaat naammanngilaq aamma ataavartumik pitsanngorsaataanavianngillat, Naalakkersuisuni ilaasortaq allappoq.

Taamaammat suliffissaaleqisut suleqqilernissaannut ikiuutaasinnaasumik Naalakkersuisut siunnerfeqartumik suliniuteqarnertik ukkataraat. Suliassalli imaannaangitsuunera taassuma nassuerutigaa.

- Suliffissaaleqisut ilarpassui suliffissaaleqinerinnarmik ajornartorsiuteqanngillat. Inuit takku suliffeqartilerniarlugit inunnik isumaginnittoqarfiup, peqqinnissaqarfiup suliffissarsiuussisarfiullu akornanni suliassaqarfiit akimorlugit suleqatigiittoqassaaq, Vittus Qujaukitsoq allappoq.

Oqaluuserisassatut pilersaarutit naapertorlugit Aningaasaqarnikkut Ingerlatsineq pillugu 2014-imut nalunaarusiaq Inatsisartut ullumi oqaluuserisussaagaluarpaat, tamannali aqagumut kinguartinneqarpoq.