Ukiup ataatsip ingerlanerani suliffissaaleqisut 439-nik amerleriarput

Nunatsinni suliffissaaleqineq oqallisaalluartunut ilaavoq, kisitsisillumi kommunineersut nutaat uppernarsarpaat, suliffissaaleqisut marsimi amerleriarsimaqisut.

Ataatsimut isigalugu ukiup ataatsip ingerlanerinnaani suliffissarsiortut 439-nik amerleriarsimapput. Matumani Naatsorsueqqissaartarfiup marsimi nalunaarsukkat sanilliussimavai.

Suliffissarsiortut ukiuinut agguataarneranni 20-nit 24-nut aamma 45-nit 49-nut ukiullit amerlanersaapput.

Kisitsisit nuannaarutissaanngitsumik takussutissiigaluartut, nuannaajallannartoqarput. Illoqarfinnimi pingasuni suliffissarsiortut ikileriaateqarsimapput.

Tassa Qaqortumi, Sisimiuni Tasiilamilu suliffissarsiortut ikileraateqarmata. Sisimiuni ikilerialaaginnarsimasut, Tasiilami ukiup ataatsip ingerlanerani suliffissarsiortut hunnorujungajannik ikinnerulersimapput. Qaqortumi marsimi suliffissarsiortut ukiup siulianut sanilliullugu 30-ngajannik ikinnerulersimapput.

Illoqarfinni arlalinni suliffissarsiortut ukiup ataatsip ingerlanerani ikileriaateqangaaratillu amerleriaateqangaanngillat. Illoqarfiit pineqartut tassaapput Maniitsoq, Kangaatsiaq, Aasiaat, Upernavik kiisalu Qaanaaq.