Siumut nuna tamakkerlugu juulip 28-ianiit 30-iata tungaanut ataatsimeersuarnissaa politikkikkut annertuumik malunnaateqartitsisinnaavoq. Ataatsimeersuarnermi ullormi kingullermi kina partiimi siulittaasunngussanersoq ilaasortat taasissutigissavaat. Ilaasortat pingasut siulittaasussatut sassarput: Maannakkut siulittaasoq Erik Jensen, siornatigut siulittaasuusimasoq Kim Kielsen aamma ullumikkut Folketingimi ilaasortaasoq Aki-Matilda Høegh-Dam.  

Aamma nunatsinni politikkikkut kina siulittaasunngortarnersoq nalinginnaanngitsuunngilaq. Naalakkersuisut siulittaasorisimasaat ullumikkullu Siumumik ilusiliisooqataasimasoq, Lars-Emil Johansen, taama isumaqarpoq.

Taanna politikkikkut oqaaseqartartumit, Sten Lundimit, taperserneqarpoq. Taassumalu ilanngullugu oqaatigerusuppaa Siumumi siulittaasortaassap Inuit Ataqatigiit naalakkersuisooqatini suleqatigisinnaanngippagit piffissaanngitsukkut qinersisoqaratarsinnaasoq.

Sten Lund politikkikkut oqaaseqartartuuvoq Assi © : KNR / Paarnaq Hansen

Partiip kina siulittaasortaarissaneraa apeqqutaatillugu naalakkersuisut siunissami qanoq isikkoqassanersut pillugu Lars-Emil Johansen aamma Sten Lund maanna naliliipput.

Isumaqatigiippullu: Siulittaasussatut sassartut marluk naalakkersuisut unammillissavaat. Pingajuattut alla siulittaasunngussagaluarpat Múte B. Egedep allaffiani oqiliallaatigineqassaaq.

Lars-Emil Johansen Aki-Matilda Høegh-Dam aamma Kim Kielsen pillugit:

- Tassa isumaqarpunga taakku tamarmik assigiittut, maannakkut siulittaasoq taarserneqassappat taava qinersisoqarsinnaanera periarfissatut isigineqarsinnaavoq, ilimanaateqarsinnaavoq. Pissutigalugu maannakkut naalakkersuisoqatigiinneq qanoq isummerfigissaneraat maannamut suli erseqqissumik paasinnginnatsigu.

Sten Lund Aki-Matilda Høegh-Dam aamma Kim Kielsen pillugit: 

- Kimimut atatillugu nutarterineq anginerulaartoq eqqarsaatigineqarsinnaavoq, tassanilu qanoq IA-kkut tamanna allannguinissaq annertunerulaartoq akuerisinnaaneraat taanna pissanganarsinnaavoq.

-  Aki-Matildamut tunngatillugu namminersulernissamut oqariartuutai taakkua IA-p politikkianinngaanniit iiuminaattutut isigineqarsinnaapput allallu oqariartuutigisarsimasai naalakkersuisoqatigiinnermut atatitsiinnarnissamut qularnartuusinnaapput.

- IA Siumullu isumaqatigiissinnaanngippata piffissaanngitsukkut qinersisoqarnissaa ilimanassanngila?

- Taavalu IA-kkut nutaamik arlaannik partiimik arlaannik isumaqateqarsinnaanersut tassani aaliangiisuujumaarpoq nutaamik qinersisoqassanersoq qinersisoqassannginnersorluunniit inatsisartunut.

Siulittaasussatut sassartuni pingasuusuni Aki-Matilda Høegh-Dam kisiartaalluni siulittaasutut misilittagaqanngilaq. Kim Kielsen 2014-imiit 2020-mut Siumumi siulittaasuuvoq, tamassuma kingorna Erik Jensen siulittaasunngorpoq. Taanna minnerpaamik sapaatiuppat juulip 30-iat ilanngullugu siulittaasuuvoq. Assi © : KNR/Johansinnguaq Olsen

Lars-Emil Johansen Erik Jensen pillugu:

- Maannakkut soorlu Erik Jensen ingerlaqqissappat qularinngilara Inuit Ataqatigiit Siumullu naalakkersuisoqatigiinnerat ingerlaqqilluarsinnaassasoq, suleqatigiit immunnut taamatut misigisimanerat imminnullu taamatut nalilernerat ersarimmat.

Sten Lund Erik Jensen pillugu: 

- Erimmut atatillugu immaqa nutarterineq minneq eqqarsaatigineqarsinnaavoq.

Lars-Emil Johansenip aamma Sten Lundip kina Siumumi siulittaasunngussanersoq eqqoriarusunngilaat.

Amerlaqatigiingajannik taaneqarnissaat ataatsimeersuarnerullu naanerani aalajangerneqarnissaa marluullutik taama isikkoqassangatippaat.

- Tassa nalunartorujussuuvoq, ataatsimeersuarnermi isumaqarpunga taanna ersarissiartussasoq, immaqaluunniit ataatsimeersuarneq aallartippat suli nalunassaaq, ataatsimeersuarnerup naanera tikillugu pissangassagunarpugut, Lars-Emil Johansen oqarpoq.

Qasigiannguani ulluni pingasuni ataatsimeersuarneq ingerlanneqassaaq. Sapaatiuppat juulip 30-ianni siulittaasussamik taasisoqassaaq.