Piniartut nalunaaquttap allanngortinnera pillugu isummersortut
Inatsisartuni politikerit nunatta nalunaaqutaata UTC -2-mut nikisinneqarnissaa siorna isumaqatigiissutigaat. Taamaalilluni Nuup Københavnillu akornanni nalunaaquttap nikingassutaa akunnerit pingasuinnarnngorlutik, tamanna inuussutissarsiornermi tigulluarneqarpoq.
Nalunaaquttamilli allannguinerup kingunerisaanik seqineq pisarnermit akunnermik ataatsimik kingusinnerusumi aatsaat nuisalerpoq.
Aalisartut piniartullu taamaattumik erinisullutik uninngaannarlutik suliaqarsinnaalernissaminnut qaammavinnissaanut utaqqeqqaartariaqartalerput.
Tamanna Uummannap qanittuanit Saattunit Anton Streetip isornartorsiorpaa.
- Tulluanngitsorujussuuvoq uani avannaani massakkut uanga najugarisara eqqarsaatigalugu, taanna oqarpoq.
Taanna Kullorsuarmit Otto Danielsenimit taperserneqarpoq.
- Qaamaneq nalunaaqutarlu malittaralugit piniartarama, annermik kaperlattartumiilluni taakkua malittariniarsarisassaagamik. Qaamaneq piniarnitsinni aalisarnitsinnilu iluaqutigisaqigatsigu, taanna oqarpoq.
Taamaammat taakku nunatta nalunaaquttamut malitarisimasatsinnut UTC -3-mut uteqqinnissarput taperserpaat.
Inuit 2.700-t nalunaaqutaq uterteqqikkusukkaat
Qupanuk Olsenip nunatta UTC – 3-mik nalunaaqutaqaleqqinnissaa kiisalu aasaanerani nalunaaquttap atorunnaarnissaa pillugu atsiornernik katersinermik aallartitsitsinerata kingorna nalunaaqutap ingerlaneranut nutaamut taama isornartorsiuisoqarpoq.
- Seqernup qullasinnerpaaffissaa tassa ullup qeqqata nalaaniittussaagaluarpoq, massakkut pingasup qeqqata nalaaniittarpoq equngasooqqangaarami. Taamaammat soorlu silamiitsilluta seqineq qiviaraluaraangatsigu massakkut nalornisarpugulluunniit qassinngornersoq, unioqqangaarmagu piffissaq. Seqineq tunaartaralugu nalunaaqutarsiorsinnaajunnaarpugulluunniit, Qupanuk Olsen KNR-imut oqarpoq.
Qupanuk Olsenip nalunaaquttap allanngornerata kinguneri nammineq maluginiarpai, taassumami ernera nukarleq suli seqinnarinnerani sininniarluarsinnaanngilaq.
- Oqarfigisarpara ”Uppik, innalerputit”. Taama seqineq tikkuarlugu oqartarpoq ”Suli unnunngilaq”. Ilumoorporlu, Qupanuk Olsen oqarpoq.
Saattunit Anton Streetip tamanna angerlarsimaffimmini aamma malugisinnaavaa.
- Taavalu aamma meeqqanut sunniuteqarluni. Meeqqat unnukkut sinissaarussutigisarpaat, aamma meerannguugaluarlutik malugisimavaat. Ullaakkullu aamma atuartooriaramik makititsiniaanermut assut ilungersunartarluni, taanna oqarpoq.
Qupanuk Olsenip atsiornernik katersinera unnuap qeqqanut unippoq, inuillu 2.700-t sinnerlugit tarpersiillutik atsiorput.
Qupanuk Olsenip atsiornerpassuit Inatsisartunut naalakkersuisunullu maanna tunniunniarpai, taakkumi nunatta nalunaaqutaata allanngorteqqinneqarnissaa aalajangertussaavaat.
