Qimminik naalliutsitsineq nunatta isigineqarneranik innarliivoq
Tamannalu Nunatta isigineqarneranut pitsaanngilaq, minnerunngitsumik takornariaqartitseqatigiiffiit qimussimik takornariaqartitsinermik aallussinerat eqqarsaatigigaanni.
Taamaammat takornariaqartitsinermi siunnersuisoqatigiit Visit Greenland ugguarput.
- Takornariartitsisarnermut Nunatsinnilu ukiukkut inuussutissarsiornermut taama pisoqarnera iluatsitsinerliorneruvoq.
AAMMA ATUARUK Uumasut nakorsaat: Sanilivit qimmia naalliuttoq naammattoorukku siarngutigissavat
Takornariartitsinissamik pileraaaruteqarpugut, Big Arctic Fivemik taaguukkatsinik, tassanilu qimusserneq nunani allamiut takornariarnissaannut soqutiginarsarluakkatsinni tallimani ilaavoq, Visit Greenlandimeersoq Malik Milfeldt taama oqarpoq.
Qaasuitsup kommuniani kommunalbestyrelsimi ilaasortaq Palle Jerimiassen, Siumumeersoq, takornariaqarnermut inuussutissarsiornermullu ataatsimiititaliami siulittaasoq, qimmit qanoq pineqarsimanerat pakatsissutigisimaqaa, pisimasorlu pimoorusilluni suliarineqartariaqartoq oqaatigalugu.
- Tassami pinngitsoornani isigineqarnitsinnut ajoqutaassaaq aamma tamanna pinngitsoorniarlugu iliuuserisagut nalilersoqqittariaqarpagut. Kisianni una pereermat, taama pisoqaqqinnginnissaa piniarlugu suliuniutit nalilersoqqittariaqarpagut. Akuersaarneqarsinnaanngilluinnarpormi taamatut pisoqarsimanera, Palle Jerimiassen taama oqarpoq.
E-mailikkut allattorpassuullutillu angalanissamik taamaatitsiinnartoqassaaq
Visit Greenlandimeersup Maliki Milfeldtip oqaatigaa, taama pisoqarsimatillugu takornariaqartitsinerrni siunnersuisoqatigiit saaffigineqartartut.
- Naatsorsuutigissavarput inuit e-mailikkut saaffiginnissasut. Aamma taama pisoqaraangat uumasunik illersuiniaqatigiit uagutsinnut saaffiginnittarput, soorluttaaq nunatsinnukarnissaminnik unitsiinnartoqartartoq, Malik Milfeldt taama oqarpoq.