Uumasut nakorsaat: Sanilivit qimmia naalliuttoq naammattoorukku siarngutigissavat
Uumasut nakorsaat naapertorlugu qimmit paarinerlunneqartut amerlanerusinnaalluarput, qimmimmi atugaannik misissuiartorluni illoqarfiit nunaqarfiillu tamaasa tikinnissaannut periarfissaqanngilaq.
Taamaammat Sanne Eline Wennerbergip innuttaasut pilertornerusumik kalerriisarnissaat kissaatigigaluarpaa.
- Qimmeqarfiup sanilerisaanik piginnittup ajortoqarnera takusinnaakkajuttarpaa, taamaammat pilertornerusumik kalerriisoqartarnissaa kissaatiginarpoq, qimmit toqunnginnerini, uumasut nakorsaat KNR-imut oqarpoq.
AAMMA ATUARUK Qimmit perlertut 19-it Ilulissani toqunneqartut
Ilulissani pisumi kingullermi, innuttaasup ajornartorsiuteqarneranik ilisimatitsinerata kingorna, politiit peqatigalugit takusaa tujorminarluinnarpoq.
- Qimmit ima nerisimanngitsigaat sanigorujussuarsimallutik, allaat napparsimalerlutik, uumasut nakorsaat Sanne Eline Wennerberg oqarpoq.
Qimmiutillit aasarsiorput
Ajornartorsiut taanna aasaanerani uteqqiattuuvoq, qimmiutillit taamaalinerani allanik pisassaqalersarmata.
- Ilaat umiatsiarlutik aallaarsimaartarput, allallu aavariartarlutik. Aamma aasaanerani allanik suliassarsiortoqartarpoq qimmillu nakkutigiunnaarlugit, Sanne Eline Wennerberg oqarpoq.
Nunatsinni Ilulissanilu qimminik kaatsitserujussuartoqarneranik nalaataqartoqartarnera takornartaanngilaq.