Politikereq: Meeqqat atuarfianni atualerlaanut hashi pillugu paasisitsiniaasoqassaaq

IAp Qeqqata Kommuniani immikkoortortaqarfimmi ilaasortaasa ataatsimiinneranni ikiaroornartoq hash ilaatigut oqallisigineqarpoq, iliuuseqarfigineqarnissaalu isumaqatigiissutigineqarluni.

- Ikiaroornartup haship tuniniarneqartarnera inuiaqatigiinni takussaavallaaqaaq. Meeqqat, inuusuttut inunnillu isumaginninnikkut ikiorserneqartariaqartut eqqorneqartarput, ukiorpassuarni tamanna ajornartorsiutaanikuuvoq. Tamanna akueriinnarsinnaanngilarput, Inuit Ataqatigiit sinnerlugit Qeqqata Kommuniani kommunalbestyrelsimi ilaasortaq Malene Ingemann KNR-imut oqarpoq.

AAMMA ATUARUK Ingen støtte til fri hash i Grønland

- Ajornartorsiut immikkut sammineqartariaqarpoq, iliuuseqarfigineqarnissaalu pillugu meeqqat atuarfianni aamma aallartiaarneqartariaqaraluarluni, Malene Ingemann oqarpoq.

Ajornartorsiutip annertussusaata misissorneqarnissaa siunnersuutigaat
IA sinnerlugu Qeqqata Kommuniani ilaasortaqatini, Agathe Fontain, peqatigalugu ajornartorsiutip annertussusaata misissorneqarnissaa siunnersuutigaat, immikkut ittumik paasisitsiniaasoqarsinnaanissaa anguniagaalluni.

- Meeqqat atuarfianni atualerlaat angusinnaasuugutsigit, taava ajornartorsiut siunissaq ungasinnerusoq eqqarsaatigalugu immaqa annikilliartortinneqarsinnaassagaluarpoq, Inuit Ataqatigiit sinnerlugit Qeqqata Kommuniani kommunalbestyrelsimi ilaasortaq Malene Ingemann oqarpoq.

AAMMA ATUARUK Politiet: Kom med jeres hash-tip

Qeqqata Kommuniani pitsaaliuinermut siunnersorti Paninnguaq Fleischer Lyberth oqarpoq meeqqat atuarfianni misissuinissamut atatillugu apersuinermi immersugassaq suliarineqaleruttortoq, atuartunullu aggustip naajartulernerani agguaanneqarnissaa naatsorsuutigigitsik.