Ikiaroornartumik pinngitsuuisinnaajunnaarnikut katsorsartittartut inuussulligaluttuinnarput
Ikiaroornartoq KNR-ip oqalliffianni ippassaq oqallissaarutaavoq. Katsorsaavimmit, Politiinit aamma Ilaqutariinermut inatsisinillu atuutsitsisumut naalakkersuisoq pulaartinneqarput.
Ikiaroornartumik pinngitsuuisinnaajunnaarnikut amerliartortut Katsorsaavimmit ilaatigut malugineqarpoq.
- Tassa amerlarsoorujussuusarput, ilaatigut immaqa oqaatigisinnaavara, katsorsartakkavut kisitsisaateqanngikkaluarluta immaqa 70-80 procentii ikiaroornartumik atuisuussartut, Katsorsaavimmi aqutsisoq Joori Lundblad oqarpoq.
Katsorsaavimmilu maluginiarneqarpoq katsorsartittartut ukiukilliartortut.
- Ikiaroornartumik atuisartut katsorsartakkavut inuussussigaluttuinnarput, Joori Lundblad oqarpoq.
Politiit ukiumiit ukiumut ikiaroornartumik nassaarinnittarnerat nikerartorujussuuvoq. Ukioq kingulleq annertunerusumik nassaarput, taamaakkaluartoq oqaatigineqarsinnaanngilaq inuiaat ikiaroornartumik atuinerat annikinnerusoq annertunerusorluunniit.
- 2012-imi 50 kilo ikiaroornartoq arsaarinnissutigineqarsimavoq taakkuanilu aningaasat 1,4 millionit koruunit. 2013-imi 73 kilo ikiaroornartoq, aningaasallu 5 millionit koruunit. Tassa takutiinnarpaa ukiumiit ukiumut nikingasinnaasoq, kisianni kisitsisit aamma takutippai arsaarinnissutit assaarinnissutaasut, kisianni saniatigut suli isaasut nunatsinnut ikiaroornartoq, aningaasallu aniasut annertunerujussuusinnaapput, Taitsiannguaq Fleischer oqarpoq.
Ilaqutariinermut inatsisinillu atuutsitsinermut naalakkersuisoq Martha Lund Olsenip oqaatigaa ikiaroornartoq ilaqutariini pingaarnerulertarnera meeqqanullu sunniuteqartarnera unitsinneqartariaqartoq.
- Imaanaanngitsumik ullumikkut inissisimavugut. Pingaaruteqarluinnarpoq ullumikkut aamma kikkunnit tamanit paasitissallugu inerteqqutaasoq aamma annertuumik ajornartorsiutaavoq. Minnerunngitsumik meeraqartunut meeqqanullu nangitsitseqqittarmat - meeraanerminit isigisaminit. Taamaattumik pingaaruteqartorujussuuvoq tamakkua sutigut tamatigut unitsissallugit, Martha Lund Olsen oqarpoq.
Inuk ataaseq katsorsaavimmi 22.000 koruunit missaanik naleqarpoq.
Qineqqusaarnerup nalaani aamma Inatsisartut ukioq kingulleq ukiaanerani ataatsimiineranni ilaatigut qaqilerfigineqarpoq katsorsartinneq akeqarunnaartariaqartoq. Tamannalu aalajangerneqassaaq Inatsisartut ukiakkut ataatsimiineranni ukioq manna.
Oqallinneq uani isiginnaarneqarsinnaavoq: /kl/tv/knr-imi-oqalliffik
