Illuatungiliuttut Naalakkersuisooqatigiit aningaasanut inatsisaat pillugu: Pitsaaquteqarpoq angusaqarusussuseqaranili

Aningaasaqarnermut Naalakkersuisup Naaja Nathanielsenip naalakkersuisooqatigiit aappaagumut aningaasanut inatsisissatut siunnersuutaat qaammatip aallartinnerani saqqummiuppaa.

Pisortani allaffissornerup annertusiartornera unitsinneqassasoq suliffeqarfiillu namminersortut nukittorsarneqassasut pilersaarutigineqarpoq.

Kalaallit Nunaannimi atugarissaarnermut aningaasat amigaataalertussaapput landskarsip aningaasartuutai isertitaalu aqunneqarsinnaanngippata.

Atassutip siulittaasuata Aqqalu Jerimiassenip taamaammat nuannaarutigaa, pisortani allaffissornerup ukiorpassuarni alliartorsimasup qanoq aqunneqarsinnaanera naalakkersuisooqatigiinnit isiginiarneqarmat.

- Suliffeqarfiit namminersortut akornanni siuarsaanissamik oqariartuuteqarnerat pitsaasuuvoq. Taamaattorlu namminersortunit aningaasanik amerlanerusunik landskarsimut siunissami isaatitsilernissap qanoq anguneqarnissaanik ersarissumik pilersaaruteqanngilaq, oqarpoq.

Atassutip siulittaasuatali illugiimmik pilersuisussaatitaanerup atorunnaarsinneqarnissaanik Naalakkersuisut siunnersuutaat tapersorpaa. Siunnersuummi utoqqaat utoqqalinersiaasa aapparisap isertitaanit sunnerneqarsinnaajunnaarnissaat siunertarineqarpoq.

Taamaalilluni utoqqaat aningaasaateqarnerulernissaat pilersaarutigineqarpoq.

Atugarliornerpaat ukkatarineqartut

Demokraatit 2024-mut aningaasanut inatsisissatut siunnersuutip ilaa aamma nersualaarpaat. Partii pingaarnertut isumaqarpoq piumassuserinngisaminnik meeraqanngitsut ikiorneqarsinnaalernissaat pitsaasuusoq. Naalakkersuisummi kinguaassiorsinnaanermut Danmarkimi katsortartinnissamut inuit angalanissaat katsorsartinnissaallu pisortanit siunissami akilerneqartarnissaat pilersaarutigaat.

- Meerartaarsinnaanngitsut ikiorneqassammata nuannaarutigaarput, partiip siulittaasua Jens-Frederik Nielsen oqarpoq.

Siulittaasumit aamma maluginiarneqarpoq peqqinnissaqarfimmi sulisussaaleqinerujussuaq naalakkersuisooqatigiinnit iliuuseqarfiginiarneqarmat, pisortanilu allaffissornerup annertusiartornera unissarneqarniarluni.

Naalakkersuisooqatigiilli aningaasanut inatsisissatut siunnersuutaanni suut tamarmik pitsaasuinnaanngillat. Demokraatit taamaammat aningaasanut inatsisissamik isumaqatiginninniarnissani pisortani aningaasat ikinnerusut atorneqarnissaat illuatungaanilu innuttaasunut pisariaqartitsinerpaanut akileraartarnikkut oqilisaasoqarnissaa ilungersuutiginiarneqarput.

- Innuttaasut akornanni ikiorneqarnissamik pisariaqartitsinerpaanit malugineqarsinnaasunik tunngaviusumik allannguutinik amigaateqartoq isumaqarpugut. Naalakkersuisooqatigiit siunnersuutaani takusinnaanngilarput uggoralutigulu, Jens-Frederik Nielsen oqarpoq.

Partiini illuatungiliuttuni pingasuusuni kingullertut Naleraq, qinersiviup matuma aallartinnerani Naalakkersuisuniititsilluni aallartissimasoq, KNR-imit aamma oqaloqatigineqarpoq.

Atassut Demokraatillu assigalugit naalakkersuisooqatigiit IA aamma S-ip aningaasanut inatsisissatut siunnersuutaasa aamma pitsaanerusinnaagaluarluni pitsaaquteqarnera Naleqqamit aamma nalilerneqarpoq.

- Tamakkiisumik isigalugu innuttaasunit aningaasanik amerlanerusunik aallertoqarniannginnera pitsaasuuvoq. Aaqqissuusseqqittoqarnissaanilli oqartoqarnera, pissutsinillu allannguiniartoqarnera kisiannili susoqarnaviannginnera uggoraarput. Isumaqatiginninniarnerni tamanna allanngortissinnaassagipput neriuutigaara, Jens Napãtôk’ oqarpoq.

Ukiaanerani ataatsimiinnissami matumani Naalakkersuisut aningaasanut inatsisissatut siunnersuutaat isummerfigineqassaaq. Tamatumani partiit ataasiakkaat aningaasanut inatsisissamik isumaqatigiissummut inaarutaasumut ukiup naanerani saqqummiunneqartussamut sunniuteqarnissamut periarfissaqassapput.