Partii Inuit: Taamaattumik qallunaatut oqalunnianngilagut
Oqaluttarfeeraq mikrofimut ilitsiviusoq Partii Inuit inissaraluat inoqanngilaq Ilulissat timersortarfiani qallunaatut ippassaq unnukkut qineqqusaartoqarmat. Partii nutaaq kalaallisut qineqqusaarnermi peqataavoq ersaartaanneqarluartarluni.
- Partiip pilersinneqarnerani nalunaarutigaarput politikkikkut oqallinnermi Inatsisartunilu oqallinnermi kalaallisut oqaatsivut illersorniarulgit, Partii Inuit siulittaasua Nikku Olsen KNR.gl-mut taama oqarpoq.
Taamatut aalajangersimaneq qineqqusaarneq tamaat aalajangiusimaniarpaat taamalu kalaallit kalaallisut oqalussinnaanatillu paasisinnaanngitsut immikkut piniarnagit.
- Iliuuserisarput Danmarkimi pissutsit asserluinnaraa. Danmarkimi najugaqarniaraanni qallunaatut oqalussinnaallunilu paasisinnaanissaq piumasaqaataavoq. Isumaqarpunga tupinnartoqanngitsoq uagut Kalaallit Nunaanni kalaallisut oqaluttoqarlunilu paasisinnaasoqarnissaanik piumasaqarnerput, Nikku Olsen oqarpoq.
Kalaallit kalaallisut paasisinnaanatillu ilissi oqariartuutissinnik paasinninnissamut tassa mattunneqarpat?
- Aatsaaginnaq oqaatsikka uteqqiinnassuakka. Kalaallisut oqalussinnaanatik kalaaliunerartut paasisariaqarpaat kalaallisut oqaatsivut illersorniarlugit taama iliortugut, Nikku Olsen oqarpoq.
- Nunasiaataagallarattali piumaffigineqarsimavugut Nunatsinni qallunaatut oqalussasugut. Piffissanngorpoq nunasiaataasimanerup amiakkuata taassuma qaangernissaanut, Nikku Olsen oqarpoq.
Qineqqusaarnerit sisamanngornermi unnukkut Sisimiuni ingerlaqqissapput tassanilu Partii Inuit ippassaq iliuuserisartik maleqqinniarpaat tassalu qallunaatut qineqqusaarnermut peqataassanatik.
