Nassuiaat nutaaq – aviisit piujuaannarnissaat qulakkeerumallugu taamaaliortut
Sermitsiaq.AG-mut tapiissutit unitsinnerannut aningaasarissaarnerat siullermik tunngavilersuutigaat. Taamali tunngavilersuuteqarnissaq anigaasanut inatsimmut naapertuutinngilaq.
Taamaammat Namminersorlutik Oqartussat maanna nassuiaapput, tunngaviusorpiaq tassaagaluartoq, Sermitsiaq.AG-p qinnuteqaammik piffissaq eqqorlugu nassiussinnginera.
Sermitsiaq.AG-lli pisortaa Poul Krarup tupigusuppoq.
- Taama tunngavilersuuteqarmata tupaallaqaanga. Isumaqarpungalu allamik siunertaqartut. Tassalu isumaqartut, ingerlalluarpallaartugut, taamaaliortoqarsinnaanngitsorlu isumaqarpunga. Aningaasanummi Inatsimmi tapiissutinut taakkununnga taama ittunik piumasaqaateqanngilaq, Poul Krarup, oqarpoq.
Taassumali aamma akisussaanini akueraa.
- Uagut taanna kukkuneraarput, pisortaq oqarpoq.
AAMMA ATUARUK Sermitsiaq.AG kingusinaarluni qinnuteqarsimavoq
Qinnuteqaatip kingusinaarneranik tunngavilersuuteqarluni qinnuteqaammik itigaartitsinissaq Naaminersorlutik Oqartussat qaammatini tallimani naammassiniarsaraat.
Naalakkersuisut siulittaasuata Naalakkersuisoqarfiani pisortaq, Mininnguaq Kleist naapertorlugu, tamanna peqquteqarpoq eqqarsarluaqqaarusussimagamik aviisillu ingerlanerliulinnginnissaa qulakkeeerusussimagamillu.
Mininnguaq Kleist erseqqissarpaa tapiissutinik tunniussinnginnermi, qinnuteqaammik kingusinaarluni nassiussinermik tunngaveqartoq, tamannalu inatsimmik tunuliaquteqartoq. Qinnuteqaammilli suliaqarnissamik aalajangernermi, immikkut akuersissuteqarnissamik siunertaqarsimanermik peqquteqartoq.
AAMMA ATUARUK Aleqap aviisinut tapiissutit qularnartumik tunngaveqarluni atorunnaarsippai
Poul Krarupili oqaluttuarpoq, qinnuteqaatertik inortuissukkaluaritsik, allamik oqartoqarani suliarineqartoq. Aggersarneqartarsimavoq, tassanilu aningaasaqarneq, suliffeqarfiullu qanoq ingerlalluartiginera oqaloqatigiissutaasarpoq, kisianni ataasiarluniluunniit kingusinaarussineq eqqaaneqassanani.
- Maajimiugunartoq aperigaangama, qaqugu akissutisissanersugut, akisarput juulimi akiumaarlutik. Eqqarsarpunga, isumaqaraanni, kingusinaarluta qinnuteqarsimagatta tapiissutinik pisinnaassanngitsugut, taama ataatsimeeqattaarnissaq pisariaqarsimanngikkaluarpoq, uagullu qaammatini marlunni utaqqisariaqanngikkaluarpugut, Poul Krarup oqarpoq.
