Kommuneqarfik Sermersuup nittartagaatigut peqquserlulluni taasisoqarsinnaasoq
Inatsisartut ataatsimiittarfissaata inissinneqarnissaa pillugu Nuummi innuttaasunik tusarniaaneq Kommuneqarfik Sermersuup niittartagaatigut ingerlanneqarpoq. Maannali paasinarsivoq, peqquserlulluni taasinissaq arlaleriarlunilu taasinissaq ajornanngeqisoq.
Allattoq Sara K. Jakobsen, Niels Krogh Søndergaard
aggustip 26-at 2014 14:01
Inatsisartut ataatsimiittarfissaat sumi inissinneqassanersoq ilumullu sanasoqassanersoq Kommuneqarfik Sermersuup nittartagaatigut isummerfigineqarsinnaavoq.
Peqquserlullunili arlaleriarluni taasinissaq ajornanngilaq. Tamanna e-mailit ilumuunngitsut atorlugit misilittaanikkut KNR-ip uppernarsivaa. Taasinerit arlaannaalluunniit apuussimasutut kommunimit utimut nalunaarutigineqanngilaq.
AAMMA ATUARUK Nuummi taasinialerput
Taamaattumik Kommuneqarfik Sermersuumi attaveqaqatigiinnermut siunnersorti Karsten Peter Jensen aperaarput, niittartakkakkut taasineq sooq tatiginarnerusinnaannginnersoq.
- Aalajangiussimavarput e-mailimi najukkat atorneqassasut, pissutigalugu Kommuneqarfik Sermersuumi najugallit 50 procentii Nem-ID-qanngimmata. Nem-ID atoraanni isumannaannerpaassagaluarami.
KNR.gl aamma Sermitsiaq.AG digitalimik siornatigut taasisitsigaangata isornartorsiorneqartarput, arlaleriarlunimi peqqusersullullutik taaseqattaarfigineqarsimammata.
AAMMA ATUARUK Inatsisartut ataatsimiittarfissaata inissisimaffissaanut akerliussutsimik takutitsisorpassuit
Taasisitsinermili inernerit Kommuneqarfik Sermersuumit Epinionimiillu nakkutigineqarnissaat ajornanngitsuusoq, Karsten Peter Jensenip KNR-imut oqaatigaa.
- 10.000-inik taasisoqarsimappat, taavalu nittartakkatsinnut inuit ataasiakkaat alakkarsimasut 5000-iinnaappata, taava ajortoqartoq takusinnaassavarput. Paasissutissanillu passussinitsinni tamanna eqqaamasariaqarparput, Karsten Peter Jensen oqarpoq.
Kommuneqarfik Sermersuup taasisitsinermi atortorissaarut Danmarkimi suliffeqarfimmut Epinionimit 7.500 koruunilerlugu pissarsiaraa.
