Kommuneqarfik Sermersuumi ammasumik ingerlatsinissaq IA-mit akornusersorneqarpoq
IA-p qinigassanngortitaata Mille Søvndahl Pedersenip KANUKOKA pillugu oqaaseqaatigisimasai Siumup qinigassanngortitaata marluk, Monica Dorphip Peter Davidsenillu isornartorsiorpaat. Aningaasat maanna KANUKOKA-mut atorneqartut meeqqanut kaattunut atorneqartalissappata ajornartorsiut angisimassaqaaq. Sooruna tamanna kommunip tungaanit ukiuni kingullerni sisamani tusagaqarfigisimanngikkipput, Siumup qinigassanngortitai aperipput.
Allattoq Peter Troelsen, Simon Uldum
marsip 23-at 2013 10:35
IA-meersumik borgmesteriutitaqarnerup nalaani paasissutissanik taama ittunik kommunalbestyrelsimi saqqummiussisoqarsimanngilaq. Taamaammat imminut apereqqajaanarpoq sooq taamaaliortoqarsimannginnersoq. IA-p tungaanit paasissutissanik toqqorteriniartoqarsimanerpa imaluunniit, Dorph Davidsenilu aperipput.
-Qinigaaffimmi qaangiutilersumi meeqqanik kaattoqartalersimappat, IA-kkut
kommunalbestyrelsemi siuttuunertik atorsimassavaat pisuusaarlutik, kusassaallutik toqqorterujussuarlutillu. Nalornisigineqassanngilaq Siumut
kommunalbestyrelsimut qineqqusaarnermini pingaarnerpaatut anguniarmagu
innuttaasut suliffeqarfiillu kiffartuuneqarnerat pitsaanerpaamik
salliunneqartassasut, Monica Dorph Peter Davidsen oqarput.
