Immikkut ilisimasalik: - Naalagaaffiup allanut attaveqarnera pisinnaasassani pingaarnerpaassaaq
Sinniisoqarfiup pisortaatut atorfinitsinneqaqqammersup Aviâja Helmsip pisinnaasakippallaaneragaalluni isornartorsiorneqarnini pissutigalugu atorfimminit tunuarnerata kingorna taama naliliivoq.
Innuttaasut taama ikitsigitillugit naalakkersuinikkullu sulinermik misilittagallit taama ikitsigitillugit, Kalaallit Nunaata sinniisoqarfimmi pisortamik naalakkersuinikkut sulinermik misilittagaqartumik toqqaanissaa isumatusaarnerussaaq, Københavnip Ilisimatusarfiani naalagaaffimmi pissutsit pillugit post doc Ulrik Pram Gad, nunatsinni pissutsinik
ukiorpassuarni malinnaasoq taama naliliivoq.
Naalakkersuinikkut sumut ataneq isiginiarneqassanngilaq
Isornartorsiuinerup ilaa - suliffeqarfimmi naalakkersuinikkut aqunneqartumi ukiuni arlalinni sulinermik misilittagaqarnissamik piumasaqaateqarnerup saniatigut - atorfimmut piukkullugu toqqarneqartup Siumup Folketingimi ukiuni arlalissuarni siunnersortigisimasaanik ueqarneranut tunngassuteqarpoq. Kalaallit Nunaatali Danmarkimi Sinniisoqarfiani pisortamik toqqaaniarnerani naalakkersuinikkut sumut ataneq isiginiarneqartariaqanngilaq, Ulrik Pram Gad isumaqarpoq.
AAMMA ATUARUK Aviâja Helms tunuarpoq
- Sinniisoqarfiup pisortaata suliassaraa naalagaaffiup allanut attaveqarnerata isumaginissaa, aammali pisortatut sulisussaavoq pisortallu suliffeqarfiutaanni naalakkersuinikkut aqunneqartumi inatsisitigullu sinaakkusersorneqartumi sulisussaalluni.
Nunatta Danmarkimi sinniisoqarfiani pisortamik atorfinitsitsiniarneq uissuummissutigineqarpoq, atorfinitsitsiniarnermi ataatsimiititaliaq piukkunnartumik toqqaaniarnermi avissaartuuffiusimammat. Taannaannarluunniit eqqumiittoq, Ulrik Pram Grad isumaqarpoq.
- Namminermi isummersinnaatitaaneq naalakkersuinikkullu sulisinnaatitaaneq, pisortanilu atorfeqalernermi taamatut suliaqarneq unitsillugu sulisinnaatitaaneq tamat oqartussaaqataaneranni tunngaviulluinnarpoq. Tamannalu inuiaqatigiinni kalaallini taama ikitsigisuni pisariaqarluinnarpoq. Inuit piffissap ilaatigut naalakkersuinikkut isummersimanerat pissutigalugu ukiorpassuarni mattussaasassappata, immikkut pikkorissuseqartut toqqarneqarsinnaasut ikiliartupiluussapput.
AAMMA ATUARUK Kuupik Kleistip atorfinitsineq pillugu oqallinneq unitseqquaa
Paarlattuanik naalagaaffinnut allanut attaveqarnerup isumaginiarnissaanut pisinnaasat pingaartinneqarnerusariaqarput. Pingaartumik Kalaallit Nunaat Danmarkimit avissaariartuinnartinneqassappat.
- Avissaarnissamik sulinuteqarneq sukkanerulersinneqarpat, sinniisoqarfimmi pisortatut atorfik aallartitatut atorfittut isikkoqaleratarsinnaavoq. Nunat allat aallartitaat Københavnimi naapisimaarneqartarput, Danmarkimulli attaveqarneq siunissami piffissap ilaatigut aallartitaqarfittut attaveqarnertut isikkoqalertussaassaaq.
