Kuupik Kleistip atorfinitsineq pillugu oqallinneq unitseqquaa
- Uanga allatuulli periarfissaq atorlugu atorfimmut qinnuteqarpunga, qinnuteqartutullu allatuulli atorfinitsitsisarnermut ataatsimiititaliamit oqaloqatigineqarpunga nalilersuiffigineqarlungalu, Kuupik V. Kleist oqarpoq.
Manna tikillugu apersorniarneqartarninnut tamanut naameernikuuvunga aamma matuma kingorna tamanna pillugu oqaaseqaqqinnavianngilanga, Kuupik V. Kleist erseqqissaavoq.
Toqqaaneq naammagittaalliuteqarfiginngilaa
Aalajangiusimallugulu oqaatigaa atorfinitsinneqannginnini pillugu naammagittaalliuteqannginnami aamma qinnuteqarsimasut akornanni toqqaaneq ataqqillugu.
- Massakkut allaat aviisit ilaata”tasisitsiniarnera” isumaqarpunga killissamik qaangiinerusoq, atorfinitsitsineq qanorluunniit isumaqarfigigaluaraanni.
- Uannut iluaalliuutaavoq aamma qularutiginngilara atorfinitsinneqartussatut toqqarneqartumut, qinnuteqartunullu allanut, taamaassasoq, Kuupik V. Kleist atorfimmut qinnuteqarnera pillugu tusagassiuutini sammineqarnera pillugu taama oqarpoq.
Eqqartuussissuserisoq Aviâja Helms, Namminersorlutik Oqartussat Københavnimi sinniisoqarfiani pisortatut atorfinitsinneqarpoq.