ATAATSIMUT ISIGALUGU Tarnimikkut nappaatillit sammineqarnerat
Tarnimikkut nappaatillit Ineqarnermut Naalakkersuisoqarfiup Kommuneqarfik Sermersuullu akornanni qaammatit marluk sinnerlugit assortuussutaasimapput.
Inissianik attartortut naammagittaalliuuteqarsimapput, saniliminnit tarnimikkut nappaatilinnit qunusaarneqartarnertik akornusersorneqartarnertillu naammagittaalliuutigalugu - suliarlu tassani aallartivissorpoq.
SULIAQ NAATSUMIK ALLAASERALUGU:
• A/S Inissiaatileqatigiiffik INI inissianik attartortunit naammagittaalliorfigineqarpoq, taakku sanilitik tarnimikkut nappaatillit "nipiliortarnerarlugit, mingutsitsisarnerarlugit qununarsinnaasarnerarlugillu" naammagittaalliuutigaat.
• INI naapertorlugu, suliat ataasiakkaat Kommuneqarfik Sermersuumut saqqummiunneqarput, kommunillu naliliilera malillugu pineqartut imminnut isumagisinnaapput.
• Tamannalu aallaavigalugu INI Namminersorlutik Oqartussanut juunip 26-ani 2014-imi saaffiginnissuteqarpoq.
• Ineqarnermut Naalakkersuisoqarfimmi immikkoortortami pisortaq Ruth Lindhardt, Ineqarnermut Naalakkersuisoq Sivert K. Heilmann sinnerlugu, Kommuneqarfik Sermersuumut juulip 21-ani allagaqarpoq.
AAMMA ATUARUK Ineqarnermut naalakkersuisoqarfiup allagai borgmesterip tupaallaatigai
• Allakkani atuarneqarsinnaavoq, Namminersorlutik Oqartussat inissiarsuaataanni inissiat alliit kommunip innersuussiffigisinnaasai tarnimikkut nappaatilinnut attartortinneqaqqusaajunnaartut.
• Kommunilu taamaaliussagaluarpat, tassalu Namminersorlutik Oqartussat inissiaataanik tarnimikkut nappaatilinnut attartortitsilluni, taava kommuni inissianut taakkununnga innersuussisinnaatitaanini annaassavaa.
AAMMA ATUARUK Tarnimikkut nappaatillit aqqusiniinnarmut innersuutissallugit siunertaqanngilaq
• Kommuneqarfik Sermersuumi "ilumut taamatut allattoqarsinnaava?"-mik, imminnut aperipput.
• Kommuneqarfik Sermersuup allakkat pineqartut assilineri Inuttut Pisinnaatitaaffiit pillugit Misissuisoqarfimmut Københavnimiittumut aggustip arfineq-aappaani 2014-imi nassiuppai.
• Misissuisoqarfik aggustip 18-iani akissuteqarluni allappoq, inuit tarnimikkut nappaatillit, innarluutilittut isiginiarneqartussaasut.
AAMMA ATUARUK Ineqarnermut naalakkersuisoqarfiup inuttut pisinnaatitaaffiit unioqqutippai
• Naalakkersuisoqarfiup kommunimut allagaqaataa taamaasilluni Naalagaaffiit Peqatigiit innarluutillit pillugit isumaqatigiissutaannut naapertuutinngilaq taamaattumillu inuttut pisinnaatitaaffinnik unioqqutitsinerulluni.
• Allagaqaat pineqartoq KNR-ip septembarip aqqarnangani avammut saqqummiuppaa.
• Oqallinneq aallartippoq. Tarnimikkut nappaatillit kommunimit akisussaaffigineqarnerat Namminersorlutillu Oqartussat inissiaataanni najugaqassannginnerat Siverth K. Heilmannip aalajangiusimaannarpaa.
• Inatsisartut Ombudsmandiata suliaq misissulerpaa Ineqarnermullu Naalakkersuisoqarfik nassuiaateqaqqullugu.