USA-mi naalagaaffiit marluk Joe Bidenip qinersinermi ajugaanera aamma akuerigaat
USA-mi naalagaaffiup Wisconsinip guvernøriata Tony Eversip Joe Bidenip præsidentimut qinersinermi ajugaanera ataasinngornermi akueraa.
Tony Evers taama nalunaaruteqartoq, nutaarsiassaqartitsivik Reuters allappoq.
- Novembarip ulluisa pingajuanni qinersinerup akuerineqarnissaa pisussaaffigalugu ullumi akueraara, Evers oqarpoq.
Joe Biden qinersisartut sinnerlugit taasisartunik qulinik Wisconsinimit taamaasilluni pisortatigoortumik pissarsisoq, nalunaarummi allaqqavoq.
AAMMA ATUARUK Taasisinnaasut Bidenimut toqqaassappata Trump aniniarluni neriorsuisoq
Naalaagaaffiup Arizonap Bidenip qinersinermi ajugaanera ataasinngornermi aamma akuerereeraalu Wisconsin aamma akuersisoq, aviisi The New York Times allappoq.
Bidenip naalagaaffinni taakkunani marlunni ajugaanera maanna præsidentip Donald Trumpip apeqqusernikuuaa.
Qinersinermi peqquserluttuliortoqarsimanerarlugu kisitseqqittoqarnissaa Trumpip piumasaraa, assersuutigaluguli Wisconsinimi immikkoortuni marlunni kisitseqqittoqarmat Bidenip ajugaanera pisortatigoortumik inerniliunneqarpoq.
Naalagaaffinni allani qinersinermi inernerit Trumpip aamma apeqquserpai, Bidenilli ajugaanera kisitseqqittoqarnerani taakkunani aamma paasinarsivoq.